أسماء مسلم
كشفت الفنانة أروى جودة عن سبب تحمسها للمشاركة في مسلسل “نعمة الأفوكاتو”، والذي عرض في الموسم الرمضاني الماضي، والذي جسدت فيه دور سارة، إذ نال اعجاب عدد من الجمهور.
ووفقًا لتقارير الصحفية، قالت “جودة”: “لما قرأت المسلسل كان عجبني القصة كلها على بعض، وكل ما كنت بقرأ صفحة بكون عاوزة أعرف اللي هيحصل في الصفحة اللي بعدها، وكل لما أوصل لنهاية الحلقة بكون عاوزة أعرف اللي هيحصل، وأول حاجة جت في دماغي إن الناس هيعجبها المسلسل”.
وأضافت أروى إلى أن دورها في مسلسل نعمة الأفوكاتو جريء عما قدمته من قبل، قائلة: “دوري في نعمة الأفوكاتو أكيد جريء عن الأدوار اللي بعملها ولكن لو معملتش الحاجة اللي تخوفني كممثلة هفضل محصورة في حاجة واحدة، وأنا من أول ما بدأت بحاول أختار أدوار مختلفة عن بعض”.
وتابعت:” وعملت مدمنة في زي النهاردة، ورقاصة في أهو ده اللي صار، وسارة في نعمة الأفوكاتو، وكل فترة بحاول ماحصرش نفسي في حاجة معينة وممتع أنك تجرب حاجات جديدة وتكسر القالب اللي إنت مرتاح فيه”.
شائعات مجاملة محمد سامي لـ مي عمر في نعمة الأفوكاتو
استكملت الفنانة أروى: “محمد سامي ومها سليم أول مكالمة بينا قالوا لي ده مسلسل مي عمر، هل تقبلي، وأنا مقدرش أوافق على عمل وبعد ما أدخله أزعل وأقول نجم عليا مراته، والله أكبر ما شاء الله ربنا يرزق كل واحدة بزوج يحبها زي ما محمد سامي بيحب مي عمر، وهي كمان ست جميلة وتستاهل الحب والنجاح ده، والله أكبر عليهم”.
أوضحت أروى جودة أنها لم تشعر بحساسية تجاه مي عمر، خاصة أنهما من نفس الجيل، قائلة: “اللي شجعني لما فكرت، والحاجة اللي سهلت عليا قبول الدور، هو إننا الثلاثي نعمة وسارة وصلاح، التلاتة ما ينفعش تشيلي شخصية منهم”.
وأضافت “جودة”: “التلاتة بيكملوا بعض وده خلى مها سليم وسامي قالوا مش مشكلة نكلم أروى لأن دماغها أكبر من إنها تقول محمد سامي هينجم مراته عليا، والمعادلة ما تكملش لو حد فينا نقص”.
