كتبت – جهاد عامر
كشفت النجمة لوسي عن حقيقة الاتهامات التي وجهها لها فريق عمل مسرحية “الحفيد”، بسبب ضربها لأحد زملائها في العرض على خشبة المسرح القومي أمام الجمهور، حيث قالت إنها لم تفعل ذلك بل أنها هي من تعرضت للإهانة من بعضهم أمام الحاضرين.
وأكدت لوسي خلال مداخلة تلفزيونية: “المسرح مليان كاميرات وأنا ست متربية، وأعرف يعني أي ألتزام، ولو حد قل أدبه عليا مبردش الإساءة بالإساءة أبدًا، كل دي اتهامات فارغة ملهاش معنى، وحد عايز يلمع نفسه ويستغل اسمي، لأني حفرت في الصخر عشان أعمل اسمي”.
وأعربت لوسي عن حزنها، قائلةً: “أنا بدعم الشباب واتعاملت معاهم كـ أم وأخت وصديقة لهم، ولكني تعرضت للإهانات من زملائي الفنانين المشاركين في العرض، ومقدرتش أرد عشان الجمهور جاي عشاني، فلما أتهان وأتعرض للتنمر مش هسمح بهذا الأمر إطلاقًا”.
وتابعت لوسي نافية كل الاتهامات ضدها: “أنا مضربتش حد برة سياق شغلي، أنا بحترم نفسي عشان احترام الآخرين، وفي إيماءات حصلت من ورا ضهري على المسرح وبعض الحضور لاحظ وتم إبلاغي بما حدث.. أنا مش جاية أتخانق، علشان عايزيني أقعد معاهم وأرغي معاهم”.
وفي ذات السياق، رد الفنان تامر فرج ساخرًا على تصريحات الفنانة لوسي خلال مداخلة هاتفية أخرى: “بضحك من كل قلبي، لأن الكلام نفسه أي ذي عقل رشيد هيفهم ويميز، يعني إيه إحنا بنعمل كل ده، عشان عايزينها تطلع معانا عشان نضحك ونقول هاها؟!”.
وأضاف تامر معربًا عن كذب تصريحات لوسي: “في كاميرات وتقارير بيكتبها المخرج المنفذ ومساعدين الإخراج، لو دا حصل هيثبت في كتابات وتقارير المخرجين، الحقيقة الموضوع بقى محزن ومضحك في نفس الوقت، مش هتنازل عن اللي اتقال، حصل ضرب وإهانات وشتائم، والفنانة هتنكر كلامي، الأستاذة بتتنرفز بسرعة بتفهم حاجات كتيرة غلط، وربنا يديها الصحة، في حاجات بتخطلط عليها في الأمور”.
وأتم تامر فرج حديثه: “نفسي المسرحية ترجع تاني، عشان الولاد اللي معندهمش شغل، واتقطع أكل عيشهم، كان نفسهم المسرحية تكمل، وفي ورق وتحقيقات شغالة، ولو مسرحية الحفيد رجعت معتقدش هترجع بـ لوسي، خاصة لأنها قدمت الشكوى عشان المسرحية تتوقف ومحدش يقدمها غيرها”.
