كتبت – إيمان عمارة
أشار الفنان عمرو وهبة على معاملة الإنسان للحيوانات بطريقة غير آدمية، حيث كتب عبر حسابه الشخصي بمواقع التواصل الإجتماعي “فيسبوك”: “هى بديهيات بس نقولها، إحنا اتربينا على مثل وكلمة بنرددها كلنا فى الجد والهزار بتقول “كلب وراح”، على أساس أن الكلب ده أو الحيوان عامة تمام يروح عادى مش مهم”
وتابع “وهبة”: “أى حد ربى حيوان هيفهم ده أكتر بس عامة الكلاب والقطط والحمير والأحصنة كائنات حية، والكائنات الحية بتحس، وبتحس دى يعنى بتفرح وبتخاف وبتتوجع وبتتخض وبتزعل وبتزهق وبتتعصب وبتتوتر”.
وأضاف الفنان: “وده مش كلام عاطفي، ده كلام علمى، الجهاز العصبي بتاعهم بيشتغل زينا في حاجات كتير، وعندهم مشاعر وإن كانت بشكل مختلف شوية عننا كابشر، وهما مش كائنات دايماً اقوى مننا فى التحمل هما زينا بيتعبو عادى، وبيتوترو ساعات من الزحمة والدوشة، وبيتعصبو ساعات من هزار الاطفال وغلاستهم العادية، وبيزعلو من سوء التعامل والإهانة”.
واستكمل حديثه قائلًا: “بالعكس هما كمان أضعف عشان هما زى الاطفال كده، مش بيعرفو يتكلمو ولا يعبر فا مينفعش نستقوى عليهم، ولا نطلع عقدنا عليهم، حتى تحت مسمى لازم يتربى، لازم يخاف منى لازم اكسره أو هو متعود على كده”.
وشاركت الفنانة ريهام عبد الغفور أيضًا في هاشتاج للمطالبة بإقالة مدير إدارة الطب البيطري بطنطا الدكتور حمدي حجاج، بعد الجدل المثار حول تورطه في قتل كلب “هاسكي”، بالغربية، ونشرت عبر صفحتها على موقع التواصل الاجتماعي “فيسبوك”، هاشتاجًا بعنوان “إقالة دكتور حمدي حجاج”، وانضمت بعض الفنانات إلى الهاشتاج ومنهم آية سماحة، وولاء الشريف.
