حوار – إيمان عمارة
يتقدم موقع الأنباء المصرية الجديدة لعمل حوار خاص مع الطالبة هبة محسن عبدالرازق الأولى بالثانوية الأزهرية بقسم الأدبي، على مستوى الجمهورية بمجموع “619”، وبنسبة “98.25%” ابنة قرية بساط طلخا بمحافظة الدقهلية.
كشفت هبة عن روتين يومها وقت الدراسة قائلة: “كنت ببدأ يومي من بعد صلاة الفجر، بفضل اذاكر لحد الساعة 10، وبعدها بروح بقى دروسي، واجي من الدروس أساعد والدتي وأكمل مذاكرتي، يعني اليوم مكانش كله مذاكرة، لكن كانت طبعا بتاخد أكبر جزء من اليوم، وأهم شيء واللي دايما بنصح بيه هو عدم المراكمة نهائي، والمذاكرة أول بأول هيكون كل شيء سهل إن شاء الله”.
وعند سؤالها عن توقعها بأن تكون الأولى قالت “محسن”: “مكنتش أتوقع خالص والله إني أكون الأولى يعني، ولكن كنت بدعي إني أطلع الأولى على المركز مثلًا أو المحافظة، لكن على الجمهورية كانت مفاجأة لينا كلنا الحمدلله”.
كما أوضحت الأولى بالثانوية الأزهرية أن عدد ساعات المزاكرة يوميًا تتراوح ما بين من “3 لـ 5″ ساعات، وعلى حسب اللي بيتطلبه اليوم مني، ولازم يكون فيه يوم بريك الواحد يفصل فيه شوية، ويقلل ساعات المذاكرة”.
أما عن دور أهلها قالت هبة محسن: “الحمدلله أهلي كلهم بلا استثناء من والدي ووالدتي وإخواتي وصحابي كانوا كلهم أكبر داعمين ليا، ودايما واثقين إني هكون حاجة كبيرة إن شاء الله، وأهم شيء إنهم مكانوش بيضغطوني، ودايما يقولوا أي مجموع هتجيبيه هنكون فرحانين وفخورين بيكي”.
فضلًا عن دور أساتذة هبة أشارت قائلة: “طبعا مدريسيني كلهم بلا استثناء والله أحب أشكرهم كلهم، كانوا السبب بعد ربنا إني أوصل للي وصلتله، ودايما كانوا بيتأملوا فيا خير، وبيتوقعوا ليا مستقبل باهر”.
وكذلك تقدم هبة النصيحة للطلاب المقبلين على الثانوية معلقة: “أهم حاجة والله هو الإلتزام بالصلاة والوِرد اليومي من القرءان والدعاء دائمًا، وميكونش فيه ضغط من الطالب أو الأهل، والتنظيم وعدم المراكمة، لأن الكسل بينشأ عنه كسل أكبر ومراكمة أكتر، وبالتوفيق إن شاء الله للجميع”.
