كتبت – وفاء العسكري
أوضح المخرج بيتر ميمي عدد من النقاط ردًا على تساؤلات بعض متابعي مسلسل “الحشاشين”، حول الحلقات الأربعة التي عرضت.
وكتب بيتر ميمي عبر حسابه بموقع فيس بوك: “طيب كل سنة وأنتم طيبين، مع إنى مكنتش حابب اتكلم علشان دول كلهم 4 حلقات!، مبدأيا المسلسل من وحي التاريخ، وده مكتوب نصًا في التترات، يعني مش وثيقة تاريخية لكنه دراما تاريخية، وهو تارنتينو لما قتل هتلر فس السينما كان حقيقة؟”.
وتابع بيتر: “أو نابليون في فيلم ريدلي سكوت الأخير، هل ده نابليون اللي في كتب التاريخ؟ ديه دراما تاريخية، حاولنا نعمل خيال تصويري لفترة من الفترات لكن في شكل درامي، لكن رجعنا في الديكور والملابس لمراجع كتيرة، ونادرة علشان نعمل عالم مشوفنهوش قبل كده، وميكنش شبه أفلام أو مسلسلات عالمية”.
وأضاف ميمي: “هل ده حسن الصباح؟ مفيش كتاب اتفق على حسن الصباح، لأن المغول حرقوا القلعة، وكتبه وأفكاره والمجهود اجتهاد، ماركو بولو أو فلادمير بارتول أو برنارد لويس أو فرهاد دفتري وكتير جدًا، حسن الصباح كان بيعمل معجزات؟ لا طبعا!!! وده تباعًا مع الحلقات هيتفهم”.
واستطرد المخرج: “الحشاشين مسلسل تاريخي بالعامية المصرية، الأحداث بين أتراك وفرس، لما عملوه الأتراك اتكلموا تركي، ولما عملوه الأمريكان بيتكلموا إنجليزى، احنا عاملينه في مصر والترجمة موجودة فى كل بلد، المسلسل بيتعرض في روسيا وأمريكا وأكتر من بلد كل بلد بلغتها، هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الأمريكية”.
وتسائل المخرج ميمي: “ليه حسن الصباح؟.. حسن الصباح شخصية فذة وغريبة ومستفزة أنك تعرف عنها، مش لازم يكون رمز للخير علشان يتعمله مسلسل، هتلر وراسبوتين كانوا في منتهى الشر لكنهم شخصيات فذة غيرت العالم، أو على مستوانا المصري خط الصعيد أو سفاح إسكندرية”.
وواصل كتابته: “أم الخليفة رصد كانت نوبية الأصل، وإسكندرية مدينة في مصر، لأن في مدن كتير باسم إسكندرية حوالين العالم، لزم التوضيح للترجمة لأن فيه غير مصريين بيتفرجوا على المسلسل، ومجاعة القاهرة الفاطمية مثبوتة تاريخيًا، لكن تعددت أشكالها حسب المصادر”.
وتابع بيتر ميمي: “وهى على فكرة كانت قبل وصول حسن بفترة مش بعيدة بس، ديه دراما “من وحي التاريخ”، ماتسمى بمعجزات حسن الصباح مقصود تتصور بالشكل ده، وده هيبان تباعًا وخصوصًا مشهد الراوي حلقة 8، عم ملك شاه اتقتل بوتر القوس، لأن ده كان عرف وتقليد، مين الست اللى بتظهر لحسن الصباح؟ ده فى حلقة 30 بقى لو ربنا ادانا عمر”.
