كتبت – أسماء حليمة
شارك المطرب تامر حسني جمهوره اليوم، عبر حسابه الرسمي بموقع التواصل الاجتماعي “انستجرام”، منشورًا يفسر فيه سورة الكهف، موضحًا أن الصورة بها العديد من القصص العظيمة.
وقال تامر حسني: “جمعة مباركة على حبايب قلبي بمناسبة الجمعة وسورة الكهف العظيمة كنت بقرأها من شوية بجد فيها قصة عظيمة بين سيدنا موسى وسيدنا الخضر عليهم السلام”.
وأضاف “حسني”: “أنا عن نفسي بحبها أوي ونفسي كل اللي مش عارفها يعرفها ويفهمها، أنا عارف إني أقل من إني اتكلم في حاجة كبيرة كده”.
وواصل: “وأنا بقرأها قولت أبقى أناني أوي لو الجمال ده كله والفهم والمعاني الرائعة دي موصلتهاش لإخواتي وخصوصًا إننا في عصر أحداثه كتيرة وبنشوف قدام عينينا حاجات أكبر من إدراكنا حاجات تخلينا نسأل ليه حصلت بخلاف عظمة كل حرف في القرآن الكريم”.
وتابع: “السورة فيها قصة بتتكلم عن عدم فهمك وإدراكك لكل قدر بيحصل ليك بتبقى شايف إنه شر وإزاي ربنا عملهولك عشان في خير من وراه أكبر بكتير لمصلحتك ولولا اللي هو شر من وجهة نظرك إنه حصلك مكنتش هتعلى وتنجح أكتر”.
وأكمل: “يعني لو حد دخل حياتك واتسببلك في أذى نفسي أو مادي لازم تثق إن ده حصل لمصلحتك بس طبعًا تصبر وتقول الحمد لله من ثقتك في إن ربنا مش بيريد للإنسان غير الخير حتى لو الإنسان شاف إن اللي حصله ده مش خير”.
وأردف: “بيكون عشان عدم مقدرته على الإطلاع على الغيب، وعشان إتأذى بجد وعشان تعب بجد بيشوف إن ده شر بس تخيل لما توصل من الثقة المطلقة في ربنا وإن عمرك ما تحط ربنا في موضع اتهام بإنه مش بيحبك أو إن أقداره غير عادلة، لازم تفهم إنه فعلًا عمل كده لمصلحتك”.
وأكمل: “هتلاقي مصلحتك بتيجي أسرع والبلاء يترفع عشان رضيت وصبرت وقولت أنا واثق فيك يا رب سامحني إدراكي قليل وعلمي قليل إني أفهم كل حكمتك بس أنا واثق في عدلك وواثق إنك بتحبني وهقول الحمد لله من أعماق قلبي”.
وأتم تامر حسني حديثه قائلًا: “قول هصبر بمنتهى الرضى وساعتها اتفرج على حياتك وهي بتتغير للأجمل وهتشوف اليقين وهو بيجيلك إنك كنت صح وإن ربنا كان في ضهرك ساعتها بيحميك وبينصرك رغم ألمك”.
