كتبت – سوزان الجمال
تحدث الفنان تامر حسني على حديث المخرج محمد سامي عنه بأنه دعمه في بداية مشواره الدرامي، كونه أول من أمن به في الدراما، وقدم معه مسلسل أدم الذي حقق نجاحًا ساحقًا في رمضان 2011.
وعلق تامر حسني عبر حسابه الشخصي بموقع انستجرام: “يمكن وقفت الوقفات دي مع ناس كتير بس لما كبروا استكبروا يقولوا كلمة حق، أو لو اتقالت بتتقال من ورا القلب، سبحان الله أكتر حد قال كلمة تجبر خاطري هو أكتر واحد ناجح”.
وتابع تامر حسني: “اللي أنكر وأتحول اختفى، والأصيل نجل وعدى كل حدود النجاح بمجهوده وقلبه، لا يصح إلا الصحيح شكرًا يا أسطورة جيلك يا حبيب قلبي يا محمد يا سامي، وربنا يزيدك نجاح وقوة وتألق”.
وسبق وأن وجه المخرج محمد سامي، الشكر والامتنان للفنان تامر حسني، لمنحه فرصة كبيرة ودعمه في بداية مشواره من خلال مسلسل آدم، حيث كتب عبر انستجرام: ولا تنسوا الفضل بينكم، وأنا قاعد امبارح في التصوير افتكرت الرحلة والشقى والتعب من أول عمل لحد العمل اللي بصوره دلوقتي وافتكرت صعوبة الحصول على فرصة عشان الواحد يثبت نفسه ويحقق أحلامه”.
واستكمل محمد سامي: “فاكر إن الكل كان رافض إني آخد الفرصة دي ومستكبرينها عليا إلا هو وقف في ظهري كأنه بيحارب لأخوه، وبصلي مرة والظروف كلها ضدي وكنت حاسس وأنا بحضر أنهم هيجيبوا حد غيري وقال لي ده مسلسلك وهتعمله وهتنجح وهتنجحنا معاك، حتى طريقته المتواضعة”.
وأضاف محمد سامي: “وهو بيقول لي مسلسلك كأني عامل 9 مسلسلات قبله، تحسس الواحد بنفسه وأهميته، أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو-طاقم العمل- محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني”.
