كتبت – إسراء محمد
صرح حسام حبيب قائلا: “أنا في صدمة ومش مجمع ما يحدث، لكني أريد أن أبدأ كلامي بكام حاجة، وهي إن في ناس كتير واخدة عني فكرة مش حلوة، ومطلعتش أدافع عن نفسي ولا مرة وكنت منتظر أنها تطلع تدافع عني، هي طلعت مرة وقالت إن حسام مخدش مني حاجة ولا سرق مني حاجة”.
وأضاف: “هي قالت على الهواء قدّام الناس كلها إني سرقت منها، بس عشان الناس تعرف أنها متناقضة، ولسه من كام يوم، قالت إن حسام ده ظهري وأهلي وكويس ومعرفش إيه، وأنا بتكلم وأنا قلبي متقطع عشان محبش أتكلم عن شيرين بالشكل ده، وهتفضل مكانتها عندي زي ماهي بس أنا المرة دي هدافع عن نفسي ليس من أجلي، لكن لأن ورائي أهل وعائلة محترمة، ساءت سمعتهم بسبب ما تفعله شيرين”.
وتابع: “بدأت أكره نفسي بسبب الحب، اللي بيحب دلوقتي بيتشاف حرامي وبيتشاف منافق وتوكسيك، أنا نرجسي؟ أنتم يا جماعة قرأتوا أعراض النرجسية إيه، إنه يكسر اللي قدامه ويجيبه عشان يفضل يمتلكوا، أنا كنت عامل لها نفسي سجادة، مش بتاع فجل أنا، واللي بيقولوا إني أتجوزت شيرين عشان شهرتها، يا سيدي خدت من شهرتها وبقيت زيّها، على الأقل كنت هعمل أغنية كل شهر وكنت هكسب فلوس كتير، بس أنا مفكرتش في نفسي ولا في عائلتي، كنت أناني إني أدّيت طاقتي كلها لواحدة داست عليّ، بقت عايزة تقول الحقيقة والناس مش مصدّقاها”.
وأعلن أن الخناقة هو مش طرف فيها قائلًا: “لم أكن أتخيل أبداً إن خناقة أنا مش طرف فيها، خناقة بينها وبين بنتها، إنها تقول كدا، وأنا هطلب شهادة بنتها، وهي عاملة في بنتها حاجة لما الناس هتعرفها شيرين هتنتهي عند الناس، لأن اللي يهون عليه ضناه يهون عليه أي حد في الدنيا، ولما شفت المنظر ده كان لازم آجي وأشيل هنا من تحتها، ولازم أتصرف”.
واستكمل حسام حبيب: “هنا بنت شيرين قالت إن حسام معملّيش حاجة ولا لماما، قالت اللي عمله إنه شالني من تحت إيديها، وقالت إن ماما هي اللي عوّرت نفسها عشان تنزل تعمل اللي هي عملته، ده حاجة عمرها ما جت في بالي، هي قالتلي زمان لما باباها كان بيتخانق مع حد بيعوّر نفسه ويروح يعمل محضر في القسم، وكنت مفكّرها بتهزّر، دي مش حاجة وراثة بس دا سلوك، ودا سلوك غلط، وأنا عاشرت شيرين كتير بس هي لما بتتعصّب بتئذي نفسها، وهي بتقول كدا لازم أضر نفسي عشان أعمل مشكلة أجبرك إنك تمشي أو متكلّمنيش تاني”.
وانهى كلامه قائلًا: “شيرين قالت لي نزّل هنا حالًا في الشارع، قلتلها مش هنزلها، قالتلي هنزلها وهكلّم أبوها وأقوله كمان ماياخدهاش، قلتلها ايه ده على جثتي، وفعلًا عملت اللي أنا عايزه وكلّمت أبوها لحد ما جه خدها، وقلتله نصيحة مني ابعدها عنها، لأن الموضوع فيه أذى بجد مبقاش تهريج، وشيرين غالية جداً عليَّ، وأنا بتقطّع وزعلان من نفسي إني بقول الكلام ده، وكفاية مثالية”.
