كتبت: هبه الله تامر
كشفت الفنانة حنان شوقي خلال لقائها في برنامج “قعدة ستات” الذي تقدمه الإعلامية مروة صبري عبر قناة “القاهرة اليوم” عن أمنيتها في الارتباط مرة أخرى، بجانب حديثها عن علاقتها بوالدها الراحل.
وقالت حنان شوقي: الحكاية بين الراجل والست حرب، ودي بعيدة كل البعد عن الحب الحقيقي، وأنا بالنسبة ليا (أنا أنت)، وياريت أبقى في قصة حب، والست بـ 100 راجل، أحميه زي ابني، وألبسه وأحطله برفان وأقص له أظافره، وألمع له حزائه وألبسه الشراب، وهو يعملي كده، والحبيب الزوج ده بيبقى ابني وصديقي وأخويا وأبويا وأمي وصاحبي وكل حاجة في حياتي، فأنا بفصل في تعاملاتي، وأنا لما بحب بعمل كده.
وعلقت حنان عن علاقتها بوالدها: بابا كان صاحبي من وأنا صغير، أنا بالذات عن إخواتي كان صاحبي جدًا، ولو حصل موقف حصل وحد عاكسني في الشارع وسألني عملتي إيه أقوله مردتش، يقولي شاطرة لأنك مش عايزة تردي.. خدت منه حنيته ورجوليته وجدعنته، وهو اللي زرع جوايا الصدق وإني أقول الحقيقة، وزرع فيا المسئولية وإزاي أتعامل، ولما أبويا انتقل لـ رحمة الله كنت صغيرة أوي وكنت محتاجة ليه، وربنا صبرني وصمدت صمود الجبال، ومكنتش مصدقة إنه انتقل إلى رحمة الله.
ويذكر ان برنامج “قعدة ستات” تقدمه الإعلامية مروة صبري على شاشة “القاهرة اليوم” يوم السبت من كل أسبوع، وتستضيف من خلاله عددًا من الفنانات وتناقش قضايا مختلفة.
