حوار – نوران عسكورة
جسد الفنان إبراهيم السمان 3 أدوار مختلفة في الموسم الرمضاني 2024، واستطاع بأدائه المتقن ومهاراته الفريدة أن يقدم الأدوار بطريقة أثارت إعجاب الجمهور، حيث شارك في “حق عرب، بيت الرفاعي، بـ 100 راجل”.
وأجرى موقع “الأنباء المصرية” حوارًا مع الفنان إبراهيم السمان للحديث عن دوره في مسلسل “حق عرب”، ورأيه في التعاون مع الفنان أحمد العوضي.
وأعرب الفنان إبراهيم السمان عن سعادته بدوره في حق عرب قائلًا: “اتبسطت جدًا، ومحمود حمدان كان كاتب ورق حلو أوي، وأحمد العوضي نجم طبعًا وأستاذ إسماعيل فاروق وشركة سينرچي فحاجة تبسط أي حد”.
وأوضح السمان رأيه في التعاون مع العوضي: “أحمد العوضي نجم شاطر جدًا وبيركز في كل التفاصيل وبيركز في شغله جدًا، وبيحاول بقدر الإمكان إنه يخرج الشغل على أكمل وجه، وبجد مبينامش من كتر تعبه على شغله”.
وأضاف الفنان متحدثًا عن كواليس حق عرب: “الكواليس حلوة جدًا والكرو كله يجنن، ودا تاني تعاون ليا مع المخرج إسماعيل فاروق فأنا بحبه جدًا، وهو مكسب لأي حد إنه يشتغل معاه، والناس كلها جميلة وبتشتغل مع بعض بحب وبيحاولوا يطلعوا حاجة تليق بالجمهور المصري”.
كما علق الفنان عن ترشيحه للدور: “الترشيح كان من محمود حمدان المؤلف، وأحمد العوضي أثنى على ذلك والشركة رحبت وكان فيه نصيب الحمد لله، ودا تاني تعاون بيني وبين المخرج إسماعيل فاروق، واشتغلت معاه قبل كدة في فيلم اللي اختشوا ماتوا”.
وكشف السمان عن متابعته لمسلسلات السباق الرمضاني: “هو علشان أحنا لسه بنصور لحد دلوقتي فأنا متابعتش بتركيز أوي بس طبعًا الحشاشين متعوب عليه جدًا، والمسلسلات اللي أنا فيها بيت الرفاعي، حق عرب، بـ100 راجل، في مسلسلات كتير أوي وكل الناس تعبت بصراحة ودا اللي بيحكم عليه الجمهور، والتلقي بيختلف من حد لحد”.
وعن سؤال الفنان إبراهيم السمان عن رأيه في المسلسلات الأعلى نسبة مشاهدة أوضح: “منقدرش نحدد هل هو على مستوى الشارع أم المنصات أم السوشيال ميديا، دا يبان في آخر رمضان لما الجمهور يقول رأيه بجد، ولكن الناس بتميل للجودة العالية، وفي أكتر من مسلسل الجودة فيه عالية جدًا”.
وأشار السمان إلى دوره في بيت الرفاعي: “بعمل دور بذرة، ولد لايت وبيقف جمب أمير كرارة في مشوار البحث عن قاتل والده، هو خفيف واستيعابه بطئ شوية بس بنحاول نقدم دا بشكل مختلف عن باقي الكاركتارات”.
وأضاف السمان عن رأيه في كواليس بيت الرفاعي قائلًا: “كواليس العمل تجنن وأمير كرارة من الممثلين اللي إضافة لأي حد يشتغل معاه، هو إنسان وفنان جامد جدًا وبيركز في التفاصيل أوي وفاهم هو بيعمل إيه وفعلًا ميجا ستار”.
وعلق الفنان عن ترشيحه في بيت الرفاعي: “ترشيحي كان من شركة سينرچي اللي أي حد يبقى سعيد الحظ إنه يشتغل معاهم”.
وأعرب السمان عن سعادته بالعمل مع المخرج أحمد نادر جلال، حيث علق: “من المخرجين اللي بيخرجوا من الممثل أحلى حاجة عنده، واتعلمت منه كتير جدًا، واشتغلت قبل كده معاه في اسم مؤقت”.
كما صرح الفنان إبراهيم السمان بأنه في رمضان المقبل سيكون هناك برنامج باسم “كريزي أوردر”، وقال بأنه شئ مختلف ويتمنى أن ينال إعجاب الجمهور، مضيفًا بأن الفترة المقبلة من المتوقع أن يكون له أعمال سواء سينما أو غيرها.
