كتبت – ميار المكاوي
أعلنت الفنانة هاجر أحمد عن تقديمها شكوى لجهاز حماية المستهلك ضد مغسلة، وذلك بعدما اتلفت لها شنطة تقدر ب 500 الف دولار.
وقالت هاجر أحمد: “تجربتي السيئة مع مغسلة، ليها فروع كتير في القاهرة الجديدة، من حوالي شهرين ونص، اتصلت بيهم اسألهم أن عندي شنطة غالية نوعها كريستيان ديور باهظة الثمن وفيها بقعة كدة بالألوان بسيطة بنتي عملاها، وسألتهم هل تقدروا تشيلوا البقعة دي ولا لأ؟ قالولي طبعا يا فندم إحنا كل شغلنا شنط ماركات وشنط غالية، للعلم أن سعرها الشنطة حاليًا تقريبًا 5000 دولار”.
وتابعت هاجر: “لأني عارفة إني لأزم أودي الشنطة للمكان بتاعها ينضفوها بس المشكلة أن أقرب مكان ليا دبي، وأنا مش مسافرة دبي الفترة دي أبدًا بعد ما اتكلمت معاهم أكدولي أنهم يقدروا ينضفوها بسهولة، وأنهم كمان بيستخدموا نفس المواد الكريستيان ديور بيستخدموها قُلتلهم أنا هديكوا الشنطة، وشوفوا هتعرفوا ولا لأ، لو لا ابعهتوهالي وأكدت عليهم فوق الـ 50 مرة، قالولي إحنا عندنا فني بيحدد هل يقدر يعمل كده ولا لأ ومش هنجازف يا فندم طبعًا”.
وأضافت هاجر: “اتصلت بيهم قُلتلهم بصيتوا على الشنطة ولا لأ، قالولي طبعًا وهتوصل خلال أسبوع متقلقيش، قُلت تمام وأكدت أنها مش بتتغسل بماية ولا بتدخل غسالة، قالولي لا طبعًا لا ماية ولا غسالة هي ليها مواد معينة.
واستكملت هاجر أحمد: “سبتهم خالص وبعتهولي بعد أسبوع، واتفاجأت لما لقيت اللوجو بتاعها اللي بـ ماء الدهب ممسوح، والشنطة محروقة من جوة والأيد بتاعتها مكسورة، ومتقطعة من الجوانب كلها دايبة وكل شكلها راح، اتصلت بيهم وطلبت صاحب المكان كلمت واحد مش فاكرة اسمه، وقالي أنا شريك في المكان ونعملك اللي أنتي عايزاه، وتحت أمرك وكان محترم أوي أول مكالمة، وقالي ابعتيلي الشنطة”.
وأوضحت هاجر : “بعتله الشنطة اللي حاطنها في كيس بلاستيك، وبعتوهالي تاني وحط فيها كيس منفوخ عشان تسند الشنطة، وبعتلي معاها بوكيه ورد، طبعًا أنا رجعت الورد، وشوفت الشنطة، وكلمت الراجل قُلتله عملت إيه قالي رجعتهالك جديدة، قُلتله حضرتك واعي للي بتقوله الشنطة اتحرقت أنتم ضحكتوا عليّا، الشنطة مبقاش ليها معالم واللوجو بتاعها اتمسح”.
استكملت هاجر أحمد: “يرد يقولي ما هو ده اللي أنتِ هتسامحيني فيها، قُلتله لا طبعًا علي فكرة أنتم سمعتكوا وحشة جدًا، وناس كتيرة عندهم ليها تجارب سيئة معاكم، وعندي اسكرين شوت أنكم بوظتوا حاجات كتير جدًا وكلها غالية، لأني سألت عليهم، قالي طيب مدام أنتِ عملتي كده، اللي تعرفي تعمليه اعمليه وأخبطي راسك في الحيطة”.
