كتبت – اسيل عادل
كشفت الفنانة صفاء جلال تفاصيل تعرضها لحادث سير مروع خلال الفترة الماضية، بجانب حديثها عن فضل الصدقات في حياتها.
وقالت: “ربنا بيوريلي بركة الصدقة طول الوقت، أنا كنت ماشية بالعربية والطريق فاضي على سرعة 80، على دائري المعادي والطريق مكنش زحمة، وفجأة العربية اللي قدامي دخلت في العربية اللي قدامها”.
وأضافت: “وأنا دخلت فيها، الحمد لله الوسادة الهوائية اتفتحت، واتصابت بحرق بسيط في إيدي، ونص العربية باظ الحمدلله، ده ربنا فداني وسترها معايا، حوادث زي دي الناس بتموت فيها، دي لحظة مميتة جدًا”.
ودعت الفنانة صفاء جلال لـ التصدق قائلة: “الأيام دي صعبة على الناس كلها، ومفيش حد معندوش ضائقة مادية، وأنا بدعو الناس كلها على قد ما تقدر تطلع صدقات للناس اللي شغالة في النظافة والحمامات”.
وتابعت: “لأن دي ست سايبة بيتها ونازلة في رمضان، وأنت واخد ولاد ورايح سينما اللي هتديه ليها ولا حاجة، الناس اللي شغالة في بنزينة، البنزين غلي على الناس كلها، زود في التيبس”.
واستكملت: “لأن دول بيجمعوا فلوسهم من التيبس ده، مش تقولي 2 جنيه، طلع ليهم أكتر لأن مرتبهم صغير، لما تروحه العامل ده مبسوط حتى لو بـ 50 جنيه هيجيب بيهم وهو مروح 2 كيلو برتقال أو كيلو بصل”.
