إيمان عمر
حل مؤدي المهرجانات عصام صاصا ضيفًا في برنامج “أسرار”، التي تقدمه الإعلامية أميرة بدر على قناة النهار، وتحدث عن رحلة صعوده والصعوبات التي واجها، وتحوله من سائق توك توك إلى أشهر مطرب مهرجانات في الوطن العربي.
وقال عصام صاصا: “قبل ما اغني كنت بقرأ قرآن، وده اللي عرفني أن صوتي حلو وكنت حافظ 15 جزء، وكنت مواظب على حضور حلقات قراءة القرآن في المسجد، اشتغلت كذا مهنة زي كهربائي مع أني كنت بخاف من الكهرباء أوي؛ لأن لمبة فرقعت في وشي، ومع ذلك فضلت مكمل واشتغلت في الكهرباء حوالي سنة ونص”.
وتابع الفنان: “بعدين اشتغلت سواق على توك توك، وفضلت أشتغل أكتر من 3 سنين وكنت حابب الشغل، لأن كنت بحب أتعامل مع الناس، وكنت يومياتي من 100 إلى 200 جنية، أثناء شغلي على التوك التوك حسيت أن عايز أغني، ومش مهم حد يسمعني، اغني واسمع نفسي، ده بالنسبالي قمة النجاح بيني وبين نفسي”.
وأضاف صاصا: “أمي تعبت عليا أنا وأخويا جدًا، وكانت بتشتغل خياطة، والـ أنا فيه دلوقتي عوض ليها عن تعبها معانا”.
وأكمل: “في بداتي كنت بغني أنا وصاحبي وماحدش كان بيسمع الأغنية غيرنا، مع مرور الوقت بطلت، لحد ما تعرفت على صديق كان سبب في شهرتي، وكان بيكتبلي أغاني، كنت بغني الكوبيله في يوم، بس ماكنش في نيتي الشهرة”.
وأكد: “أنا ماكنتش مهتم بالسوشال ميديا ولا كنت بفهم فيه، بس اتفأجات بعدد المشاهدات اللي حققتها الأغنية، لحد ما اتواصل معايا شركة مهرجانات، وطلبت مني أصور ڤيديو كليب مقابل أن أتنزل عن الأغنية”.
وأوضح: “بس ماكنتش أعرف أن في أرباح من اليوتيوب والسوشال ميديا، ونزلت الأغنية وجابت 60 مليون وماخدتش ولا جنية، وكنت لسة شغال على التوك توك”.
وأشار صاصا: “مابيفرقش معايا اغنيتي جابت مشاهدات قد ايه، ومابيكونش عارف نزلت على اليوتيوب امتى، بس متأكد أن الناس اللي شغالة معايا شغالة صح والأغنية هاتتشهر، وأول فلوس مسكتها لمة نزلت أفراح كانت من 1000 إلى 4000 جنية”.
واختتم عصام صاصا: “علاقتي بحمو بيكا كويسة، وعمري ما قابلته غير وهو بيسجل أغنية “رب الكون ميزنا بميزة”، ومدير أعماله هو السبب في التوقيع بينا كان بينقل كلام مش حصل بينا، بس مافيش بينا حاجة وبحترمه”.
