كتبت – وفاء العسكري
تحدث المخرج عمرو سلامة عن علاقته بالفنان الراحل مصطفى درويش، خاصة أنه رحل قبل إنتهاء تصوير جميع مشاهده، في فيلم “شماريخ”.
وأوضح سلامة في حواره مع الإعلامية منى الشاذلي ببرنامج “معكم” على قناة ON، أن مصطفى درويش كتب له تعليقًا على أحد منشوراته على فيس بوك قبل رحيله بساعتين، لذلك حين علم بنبأ الوفاة لم يستوعب الأمر في البداية، قائلًا: “الموضوع كان مربك جدًا”.
وأضاف عمرو سلامة: “أول مرة نتعرف على بعض كان في فيلم شماريخ، وهو جه الفيلم بترشيح من آسر ياسين، لما دخلنا التصوير كان عاجبني أوي كيميا آسر مع مصطفى، ولما توفى قعدت حوالي أسبوعين على ما سمحت لنفسي أفكر هعمل إيه في الفيلم، لأنه مات قبل ما يخلص تصوير دوره”.
وتابع سلامة: “عشان أحل مشكلة غيابه في الفيلم غيّرت في مشاهد ككتابة، وكان فيه مشاهد متصورتش، وعاملة أزمة كبير في الفيلم فحليناها بحيل مونتاجية، عشان أحل المشكلة بسهولة كان ممكن أشيل بعض مشاهده، بس أنا مرضتش أشيل أي لقطة ليه، عشان يفضل أكتر وقت على الشاشة تكريمًا ليه”.
وواصل عمرو: “وفاته كانت مرعبة تهزك جامد جدًا، خاصة إن مصطفى صغير في السن، قدي أنا وآسر تقريبًا، وكمية المفاجات اللي عرفناها بعد وفاته كانت رهيبة، مفيش حد اتفاجئنا بكمية الخير اللي عمله قد مصطفى، كان محافظ على الجانب ده ومبيتكلمش عليه”.
وقال آسر ياسين إنه تعرّف على الفنان الراحل في مسلسل بـ “100 وش”، مضيفًا: “على ما خلصنا تصوير المسلسل كنا بقينا أصحاب، وبقينا نسأل على بعض، وتوطدت علاقتنا جدًا، وفعلا قعداتنا كانت بتبقى قعدات أخوية جدًا، هو ابن بلد وجدع جدًا الله يرحمه”.
