كتبت – إيمان أشرف
تحدث المخرج عمرو سلامة عن إثارته للجدل بسبب تصريحاته، الذي يكتبها عبر حساباته الشخصية على مواقع التواصل الإجتماعي، او حديثه في إحدى البرامج، والذي تسبب له الكثير من المتاعب.
وصرح عمرو سلامة خلال لقائه في برنامج “كلاكيت”، قائلًا: “أنا اتحبست في دور الشخص المثير للجدل معرفش ليه مع أن أنا في الحياة مش كده، ومش عارف بقول إيه مثير للجدل للدرجة دي يمكن أنا غلطان معرفش مش المفروض اتكلم وأقول اللي في دماغي زي ما هو بس”.
واستكمل “سلامة”: “أنا فاكر وأنا صغير لما كانوا يقولوا إيناس الدغيدي قالت كذا أو يوسف شاهين قال كذا وخالد يوسف قال كذا وأنا في أوقات كتير بقول هو ليه الناس متعصبة من تصريحاتهم، في أوقات كتير جدًا لما بقول حاجة أو يطلع مني تصريح يعمل جدل أو يعمل خناقات أونلاين”.
وتابع: “ساعات بحس أن إثارة الجدل مفيدة وساعات لأ أنا مش مستحمله، يعني في أوقات كتير جدًا بحس أنه مفيد أننا نفتح موضوع زي دا، ونتناقش فيه كمجتمع ونكتشف إيه الصح وإيه الغلط، وفي أوقات بحس أن المفروض تعدي ولا حد يستوقفها”.
وانهى عمرو كلامه: “العصر دا مصيبته أنك طول الوقت ماشي في حقل ألغام بتقول أي تصريح في تليفزيون أو برنامج أو على النت ممكن تلاقي نفسك دوست على لغم وأنت مش واخد بالك خالص، وأنت فاكر أن الكلام محدش هيقف عنده بتقول اللي جواك زي ما تكون قاعد مع صاحبك على قهوة، لكن كل يوم الواحد بيتأكد أن الموضوع فاتورته غالية”.
