كتب – أدهم سعيد
تحدث محمد رضا بوبو لاعب وسط فيوتشر الأسبق المنتقل حديثًا إلى بيراميدز عن الأحداث التي تعرض لها خلال الأيام الماضية مع إدارة فيوتشر، بعد المطالبة بباقي المستحقات المالية لهُ بعد الإنتقال للفريق السماوي.
ونشر بوبو على حسابه الخاص بموقع التواصل الاجتماعي “فيس بوك” قالاً: “خلاص مبقيتش قادر اصبر اكتر من كده بصراحه حته لو العواقب كتير ولو هيحصل اي المهم اهدي النار الي جوايا شويه عشان اكون حته ارتحت من جوايا وكده كده ربنا موجود وهيجبلي حقي”.
واستكمل نجم فيوتشر الأسبق: “انا كنت خلصت وجالي إتصال تعالا ضروري النادي عشان تمضي الاستغناء بتاعك عشان خلاص انت مشيت قولت حاضر وركبت عربيتى وطلعت علي النادي الساعه 11 بليل الناس قبلتنى في النادي وقالولي عامل اي يارضا عايزينك تمضي ورقتين ورقة مخالصة والاستغناء قولتلهم الاستغناء حاضر همضي مفيش مشكله امال اي الي يخليني امضي مخلصه وانا ليا 4 مليون 200 الف جنيه.
واضاف محمد رضا بوبو: “كان الرد من شخص لاداعي لذكر اسمه لانه ده ميعرفش ربنا طبعا قعد يكلمني ولازم تمضي ولازم تمضي اقوله ازاي ياكابتن امضي مخالصة وانا ليا فلوس قولت مش همضي ومشيت ومضيت علي الاستغناء جالي اتصال امضي وانت فلوسك عندي ومتقلقش امضي وانت وزملائك اللي ماشيين هنيجي ونسلم عليكم وتاخدو الشيك بالدولار زي باقي الفرقة ونشكركم اكيد يعني قال اه امضى بس”.
وتابع بوبو: “اتفقت مع الاتنين الي كانو معايا عشان كنا متفقين اننا هنعمل كل حاجه بالإتفاق مع بعض فقالوا هنمضي كلنا ونروح يوم الثلاثاء ناخد الفلوس مضينا علي الورقه ومكناش مدين اي خوانه لحاجه جه يوم الثلاثاء لقينا اللعيبه كلها صحبنا المتواجدين في الفريق طلعلهم فلوس وكل واحد شيك ماعدا احنا التلاته والتلاته المعاريين الي مشيو من النادي”.
وأكمل: “اتصلت بالشخص ده قولتلو الشيك بتاعنا امته قالي بليل ف ناس الصبح وناس بليل وانت الشيك بتاعك هيكون موجود بليل قولتلو ماشي جه بليل كلمتو قالي الصبح فضلت علي الحال ده كل يوم، يوم يقولنا التلات الجاي ييجي التلات يقول الاسبوع الجاي ييجي الاسبوع الجاي يتقال بكرا كمان يومين علي الحال ده”.
واضاف: “هناك شخص مشكور طبعا بدون ذكر اسمه قالي انا بحبك وانت اخويا الصغير لو انت مفكر انك طلعلك فلوس يبقا بتحلم مصدقتيش وقولت لا اكيد الفلوس هتطلع الناس كلموني وقالولنا الفلوس عندنا وانا مصدقهم ومعايا بس من الواضح ان مفيش فلوس جايه ولا اي حاجه”.
واضاف: “علي العموم حسبي الله ونعم الوكيل ف كل واحد اكل حقي وتعبي الي شقيت فيه سنتين تعبت وسفر هنا ولعبنا افريقيا وخدنا بطوله وطلعنا مركز رابع سنتين يعني الحمدالله مقصرتش ف حاجه بس فكرت ان حد ياكل حقك ف دي صعبه عليا اوي وانا زعلان لان مشفتيش التقدير”.
وعن رحيله لبيراميدز: “انا اتبعت انا وصحابي وحلينا ازمه للنادي برقم كبير يعني انا ممشيتش ببلاش ولا مكنتش بلعب ولا مكنتش مساهم ف ده كله عشان تاكل حقي بلطريقه دي انا عارف الكلام ده هيضايق ناس بس دي الحقيقة انا ليا حق وعلي حق وانا عمري ماكنت بخاف من اي حاجه بس ازاي بتعرف تنام وتحط دماغك علي المخده وانت اكل حق وشقي واحد طلع عيونو عشان يجمع رقم زي ده وانت عايز تاكلو عليه”.
واختتم حديثه قائلاً: “بكل سهوله كده انا مكلمتيش حد من الصحافييين صحابي والي اعظ رفهم انهم ينزل الكلام علي لساني انا حقي عند ربنا وربنا هيجبهولي اضعاف وانا متاكد لاني مقصرتيش ف حاجه وربنا يعلم كده انا من جوايا ارتحت”.
