كتبت – سوزان الجمال
كشف الفنان محمد أنور عن بداياته الفنية، موضحًا أنه عانى رفقة أصدقائه بمسرح مصر، حتى توفرت لهم الفرصة الحقيقة قبل شهرتهم.
وقال محمد أنور: “إحنا شقينا وتعبنا، ومش بقول كده علشان الناس تقول أنت بتحكي قصة كفاح، بس لأ أنا بقول بجد لو أنت فضلت ورا حلمك بجد هتوصل وربنا هيكرمك، إحنا كنا بنقعد على القهوة فوق الـ 70 بني آدم، وقعدنا نقل والناس غصب عنها من ضغوط الحياة سابوا الشغلانة، وفيه منهم راح يشتغل في شركة الكهرباء”.
واستكمال محمد أنور: “أنا وأبطال مسرح مصر استنينا ومكناش عارفين أن الفرصة هتيجي، يمكن لو كانت إتأخرت شوية كمان كنا يأسنا، والله العظيم كنت بدور على وظيفة حكومية في شركة الكهرباء في نفس اليوم اللي جاتلي فيه مسرحية شيزلونج، اللي كانت فاتحة خير عليا.
وتابع “أنور”: “أحنا مكناش متخيلين أن أستاذ أشرف عبد الباقي، يجيبنا في المسرح، إحنا بقالنا 15 سنة بنمثل مسرح عايزين نروح سينما بقى، وكنا بنعرض تياترو مصر أول كام يوم فيه إحنا مش عارفين أننا ممكن ننجح عن طريق المسرح”.
وأضاف محمد أنور: “كنا بنقول إن شاء الله كريم عبد العزيز وأحمد عز، يتفرجوا على المسرحيات ويختاروا ناس مننا، وأول مرة عرضنا فيها اللي حضر كان 4 أصحاب أستاذ أشرف واتكسف يقولهم ادفعوا”.
