حوار – مرام اللبان
لفت النجم محمد عبد الحافظ أنظار الجمهور حوله، وذلك بعد تقديمه لـ شخصية “جبر” شقيق الفنانة روجينا في مسلسل “ستهم”، التي تخوض به السباق الرمضاني لهذا العام 2023.
أكد الفنان محمد عبد الحافظ في تصريح خاص لـ “الأنباء المصرية الجديدة” السبب ورا نجاح المسلسل هو الورق المميز وبقيادة مخرج بيحب الممثل”.
إليكم تفاصيل الحوار:
كيف جاء ترشيحك للدور في ستهم؟
عادتنا بيكون في ترشيحات من أكتر من حد أثناء التحضيرات المبدئيه للعمل، وطبعًا الرأي النهائي أكيد بيكون للمخرج.
دور جبر مختلفًا تمامًا عن أدوارك السابقة.. كيف كانت إستعدادتك لهذا الدور؟
دور “جبر” مختلف فعلًا عن معظم أدواري وكان فيه مشاهد كتير مهمة ” master seen“، وكان أهم حاجة في التحضير هو إتقان اللهجة، وبعد كده التركيز في الأداء بـ مساعدة المخرج طبعًا.
حدثنا عن الكيميا بينك وبين روجينا وطاقم العمل في التعاون معًا؟
طبعًا فيه كيميا بيني وبين روجينا سواء على المستوى الشخصي لإننا أخوات وعِشْرَة عُمْر، وعلى المستوى الفني أحنا مش أول مرة نشتغل مع بعض.
وكان آخر عمل لينا مع بعض مسلسل ” الاسطوره” واللي حقق نجاح كبير وقت عرضه لينا أحنا الأتنين، أما بالنسبة لـ باقي فريق العمل فأنا كنت سعيد جدًا بالتعاون معاهم والعمل إضافه مهمة ليا.
النجم محمد عبد الحافظ
ما رأيك في القضايا التي طرحت في السباق الرمضاني؟
للأسف أنا ماقدرتش أتابع كل الأعمال لإننا كنا لسة بنصور، وأكيد هـ تابع بعد رمضان، لكن بشكل عام الموسم الرمضاني كان مميز وكان مطروح فيه عدة قضايا مهمة.
وشهد ظواهر فنية مهمة زي عودة مسلسلات الـ 15 حلقة وعودة العمل الديني “رسالة الإمام ” والعمل التاريخي “سره الباتع” والعمل الوطني “الكتيبة 101” ده غير الأعمال الإجتماعية اللي طرحت قضايا كتيرة يعني كان فيه تنوع كبير.
ما الصعوبات اللى وجهتك أثناء التصوير ؟
الحقيقة مكنش فيه صعوبات، العمل كان متحضرله بشكل كويس جدًا وكل العناصر الفنية كانت متعاونه وكل شخص في مكانه.
كان هناك خوف من المشاركة في عمل فني مثل ستهم؟
بالتأكيد لا، عشان مفيش ممثل محترف بيخاف من المشاركة في أي عمل فني، القلق بيكون في محاولته إرضاء الجمهور.
ما هي الحلقة التي كانت تعتبر الفاصلة في مسلسل من وجهة نظرك؟
الحقيقة العمل كان أحداثه سريعة ومتلاحقة من الحلقة الأولى وكل حلقة أو مجموعة حلقات كانت مرحلة فاصلة لـ رحلة البطلة، بس ممكن تكون الحلقة الفاصلة لما قررت ستهم رجوعها لـ البلد وفتح ورشة والدها والعمل فيها وتصدير الالباستر.
النجم محمد عبد الحافظ
شاركت في أعمال كثيرة ما أصعب الأدوار وما أحبهم لـ قلبك؟
هقولك الرد التقليدي أن كلهم ولادي ودي حقيقة فعلًا عشان كل دور بيأخد وقت وجهد، ولازم أحب الشخصية عشان أقدر أجسدعا بـ شكل كويس يعجب الجمهور، وبالتالي كل شخصية قريبة لـ قلبي بـ شكل أو بـ أخر.
كيف كانت الكواليس مع كرو العمل؟
الكواليس كانت كويسة جدًا وكل الناس كانت بتشتغل بحب، وده طبعًا بفضل الورق المميز اللي بنشتغله وبقيادة مخرج متميز وبيحب الممثل.
