كتبت – نورهان درويش
تحدث الفنان محمد ممدوح عن كواليس مشاركته في فيلم “إكس مراتي” الذي من المقرر عرضه خلال الفترة القادمة بدور العرض السينمائي بطولة هشام ماجد وأمينة خليل ومن إخراج معتز التوني.
وقال الفنان في لقاء تليفزيوني، إن الورق حمسه للمشاركة في الفيلم بجانب تعاونه مع هشام ماجد والمخرج معتز التوني، قائلًا: “الورق شجعني أوي، ومن زمان كان نفسي اشتغل مع هشام ماجد وحاجة تشرفني لأني من معجبين هشام وبحب اتفرج على أفلامه وشغله ومعتز التوني مخرج خطير، والمنتج أحمد يوسف أخويا والورق حلو وهشام ماجد الجندي المجهول في الفيلم لأنه اشتغل على الورق كتير مع المؤلفين وأنا اتبسطت جدًا واكتشفت صديق وهو فنان كبير حقيقي وملهم وبيفكر وخطير إلى جانب أنه جدع وراجل، والفيلم مأخوذ عن قصة فيلم أجنبي واتمصر”.
وعن رجوعه للكوميديا واللايت أوضح أنه لا يفرق معه طبيعة العمل بقدر اهتمامه بالنص، قائلًا: “الورق الحلو لما يعجبني بوافق وبحس إني بعمل حاجة جديدة ومش بيفرق معايا كوميديا أو تراجيديا وبحترم دماغ الناس في الشغل وبحاول أقدم حاجة جديدة ودي حاجة مهمة للصناعة”.
وتحدث عن تعاونه مع أمينة خليل في أكثر من عمل وآخرها فيلم إكس مراتي وأهل الكهف قائلًا: “أمينة خليل فنانة شاطرة ونجمة كبيرة، والنجم ده من رأي طريقة تعامل وتصرف وطريقة تناول واختيار مش مجرد الناس بتشاور عليه، لكنه لقب كبير وهي تستحقه وهي نجمة بتدخل المكان بتوه وبتعرف ازاي تختار وبالصدفة البحتة بيتم اختيارنا في أعمال فنية مع بعض وهي شاطرة وبتترسخ في كل الأدوار، واتحدت نفسها في فيلم شقو”.
وكشف الفنان محمد ممدوح عن كيفية توازنه بين حياته الشخصية وعمله في التمثيل مضيفًا: “ساعات مش بنجح بس بحاول وأهلي بيراعوه ده ومراتي بتراعي ده لكن كاميليا بنتي بدأت تثور عليا وبكون عاوزة أقضي معاها وقت كتير وده هيكون مفيد ليها وليا أنا كمان نفسيًا، والفترة اللي فاتت كان فيه زحمة بس كانت متفرقة على كذا سنة”.
