كتبت – بسمله الجمل
عبرت الإعلامية ياسمين عز عن استيائها من التعليقات المسيئة التي وجهت إلى الفنان خالد النبوي ونجله الفنان نور النبوي، بعد شائعات إقامة الفنانة عواطف حلمي في دار مسنين بنقابة المهن التمثيلية، حيث وجه لهم البعض هجومًا لتركها في دار مسنين.
وقالت ياسمين عز في برنامجها “كلام الناس”: عواطف حلمي جدة الفنان نور النبوي وحماة النجم خالد النبوي، لقينا أخبار بالكذب لدخولها دار المسنين تبع نقابة المهن التمثيلية، وخد بقى عندك كم هجوم ولا كأنهم ولاد خالتها وولاد عمتها وداخلين يهاجموا عمياني، وداخلين ينظروا على نور النبوي والنجم خالد النبوي، اللي الحقيقة عمرنا ما سمعنا إنه طلع منه العيبة ولا اتدخل في حياة حد.
وأضافت ياسمين عز: لما قلت لكم قبل كده إنكم قلابين كنتم بتزعلوا، ومش هقول إحنا لأني مش كده وفي ناس بتربي نفسها طول الوقت زي وزي ناس تانية، أن يكون عندها شوية أخلاق ومبادئ ما روحوش وسط اللي إحنا فيه.
وتابعت “عز”: الناس بتتوحش وبتنظر وشتيمة وقلة أدب، وهي قاعدة في البيت مستخبية ورا الشاشة وحاطة صورة الليل الحزين وقاعدة تشتم ليه يا جماعة؟ ليه بتحرموا الناس يعملوا معروف، الست رايحة تزور صديقتها أو زملائها زي ما أنا وأنتي وغيرنا بيعمل خير ويعمل اللي هو عاوزه.
وواصلت “عز”: عواطف حلمي سيدة كبيرة محترمة، زمان كنا بناخد درس احترام الكبير والعطف على الصغير، والله العظيم أنا مش جيل خمسين سنة أنا شابة صغيرة جيل شباب المستقبل الورد المفحفح، وبقول لكم ده اتعلمته زمان، أمال اللي في سن عواطف يقولوا إيه عليكم؟
ووجهت ياسمين عز سؤالًا لجمهورها قائلة: عاوزة بني آدم أو فنان أو شخصية عامة أنتم ما قلبتوش عليه، حتى لو في حاله تطلعه إشاعة أنه مات، إحنا توحشنا ومحتاجين كل حد يربي نفسه.
وتابعت”عز”: وقبل ما أكون مذيعة أو مشهورة، عمري ما سمحت لنفسي أدخل أكتب تعليق لحد مسيء سواء فلان إتجوز أو طلق، أنا ماليش دعوة، فيا ريت نتعلم من بعض ونربي نفسنا، ولو العيال الصغيرة ما اتربتش نجيب ليهم حد يربيهم.
