كتبت – بسمله الجمل
تحدثت الفنانة صابرين عن تفاصيل زواجها من المنتج اللبناني عامر الصباح، مؤكدة أن قصة الحب التي جمعتهما بدأت من 32 عامًا، في أثناء تصويرها فيلم أنا والعذاب وهواك.
وقالت صابرين خلال حوارها مع الإعلامية فاطمة مصطفى، في الراديو 9090: ناس قليلة جدًا اللي عرفوا أني اتطلقت وأنا مبحبش أتكلم عن حياتي الشخصية لأني عندي أولاد، وسنوات من العمر احترمها والعِشرة متهونش إلا على ولاد الحرام، والنصيب ربنا كاتبه من قبل ما نتولد ومالناش دخل فيه.
وعلقت صابرين: بداية الحب بيني وبين عامر كانت من 32 سنة، كنت بعمل فيلم أنا والعذاب وهواك وكان إنتاج والد عامر، وإخراج أستاذ محمد سالمان، وكان صديق والده، وخلال تصوير المشاهد دخل عامر وقولتله أهًلا يا أستاذ منتج، وهما كانوا بيضحكوا على الكلام المصري جامد، وإحنا بنصور اتولدت قصة الحب.
وواصلت “صابرين”: هو كان متزوج بنت عمه وكان على خلاف معاها في الفترة دي، وبدأت شرارة الحب تحصل، وأنا قولت ليه هدخل نفسي في المتاهة دي، ووالده توفى وهو سافر وبعدنا عن بعض، وهو انفصل عن زوجته الأولى واتجوز تاني، وأنا اتجوزت وانفصلت واتجوزت تاني وانفصلت.
وتابعت “صابرين”: وبعدين بالصدفة البحتة الصديقة لمياء عبد الحميد وأخوها وائل فهمي عبد الحميد، كان بيعرض عليا مسلسل واتقابلنا، وكان في صديقة من الإنتاج بتكلمه وقالت إن هي راجعة مع عامر الصباح وهيعملوا مسلسل، أنا رجعت بالزمن وقالتلي أنه طلق، قولتلها أنا كمان اتطلقت بلا جواز وقعدت أضحك.
وأضافت “صابرين”: وفجأة لقيت رقم لبناني بيتصل عليا، كنت فكراه برنامج وطلع عامر الصباح، سلم عليا وقالي أنتي بجد اتطلقتي؟ أنا مسافر لندن وهرجع أتجوزك، اللي بعدنا الـ 32 سنة دول أنا لازم أتجوزك دلوقتي حاًلا، قولتله أنا عندي 3 رجالة، قالي سيبي كل حاجة حلوة في وقتها، وفجأة حسيت أني بنت ولادي مش أمهم.
واختتمت “صابرين” حديثها قائلة: فترة الخلافات قبل الطلاق كانت 15 سنة، وعمري ما بكيت قدام ولادي ولا كنت بشتكي، وكانوا خايفين عليا أني لو اتجوزت عامر الصباح أرجع للخلافات وأبقى متضايقة.
وأضافت “صابرين”: وقالولي خدي بالك، ولما قعدوا معاه ولقوه عاقل بحكم سننا، وأن السن ده مش سن حب اتطمنوا، وأنا لو مكنتش أعرف عامر من زمان، كان مستحيل أني أتجوز تاني.
