كتبت ـ إيمان أشرف
تصدرت الفنانة رحمة حسن خلال الساعات الماضية، تريند محركات البحث جوجل، وذلك بعدما أعلنت عن سبب غيابها وبداية معاناتها مع الصلع من الجذور.
ونشرت رحمة حسن صورة صادمة لشعرها عبر موقع التواصل الاجتماعي لتبادل الصور والفيديوهات الشهير “إنستجرام”، أكدت فيها أنها بدأت تعاني من الصلع من الجذور.
وعلقت رحمة على الصور، قائلة: “شعري ابتدا يقع من الجذور، ويقع أكتر بعد ما روحت عيادة في الزمالك، والمفروض أنه أفضل حاجة موجودة، كشفت وعملت التحليل المطلوبة كلها، كان شعري عادي خفيف تعبان لكن مش بيقع كام شعرة عادي”.
وأضافت: “بعد ما روحت وعملت التحليل الدكتورة قالتلي كلها تمام ممكن بس الحديد نازل شوية، ممكن ناخد حديد، وهنعمل بلازمة من دمك، يعني حاجة كويسة وآمان مية في المية”.
واستكملت رحمة: “المهم روحت وسألتني الدكتورة قبل البلازمة بعد سحب الدم أخبار الضغط بتاعك إيه، قولت مش عارفة، المهم عملت البلازمة وميزوثاربي، مش بلازمة بس، الكارثة أنه حططلي حقنة مينوكسيديل مع الحقنة وعملتها بالميزوثاربي، وطبعًا أنا معرفتش غير لما روحت البيت”.
وتابعت: “كان ضربات قلبي غريبة وحاسة إني تعبانة ودماغي تقيلة، بشوف الفاتورة لقيته أنها حططلي مينوكسيديل دون ما ترجعلي الأول وأنا كنت بس مفروض أعمل بلازمة فقط من دمي، بس من ساعتها شعري بيقع كل يوم ومفيش بيبي هير بيطلع أصلا ولو طلع بيقع تاني على طول”.
واختتمت “حسن”: “لو أعرف من الأول مكنتش روحت أبدًا، لأنهم حطولي حاجة أول مرة أستعملها دون ما يرجعولي الأول، وفي حاجة مهمة زي دي كان عندي ثقة قبل ما أروح، لكن طبعًا بعد اللي حصل مروحتش تاني أبدًا وشعري فضل يقع من ساعتها، أكتر وأكتر وكل الناس عارفة انك لو استعملت المينوكسيديل مينفعش يتوقف، وهم عملوا الكارثة دي دون ما يقولولي الأول حتى، ومن ساعتها وأنا شعري ونفسيتي في الأرض”.
آخر أعمال رحمة حسن الدرامية
يعد آخر أعمال رحمة حسن هو مسلسل “إيجار قديم”، بطولة كلًا من: “شريف منير، محمد الشرنوبي، صلاح عبدالله، ميمي جمال، هشام إسماعيل، حازم سمير، رحمة حسن، إلهام وجدي، بسمة داود، وأسامة عبد الله”، والعمل من تأليف عمرو الدالي، وإخراج طارق رفعت، وإنتاج كريم أبو ذكرى.
