كتبت – آلاء السيد
رد الفنان ياسر جلال على الانتقادات التي طالته، عقب تصريحاته بشأن حق الأداء العلني، وحديثه عن أن تقديمه مسلسلاً واحداً في العام ، يجعل الأجر الذي يحصل عليه بالكاد يكفي متطلباته.
وقال ياسر جلال خلال مداخلة هاتفية مع الإعلامي تامر أمين في برنامج “آخر النهار”: “أنا قلت كلمة عن موضوع أجري، والناس قالت: إزاي أنت بتاخد كده ومش مكفيك؟، لكن عايز أوضح حاجة، فيه زملاء ليا بيتباهوا بأنهم أعلى أجر في مصر، لكن أنا أقل أجر بالنسبة لزمايلي”.
وعن الرقم الذي ذكره الإعلامي تامر أمين بشأن حصوله على 40 مليون جنيه كأجر، علق ياسر جلال قائلًا: “أربعين مليون! أقسم بالله ربع التمن أزيد منه شوية، وأنا راضي، ده مبلغ كبير، لكن المشكلة إني مش بعمل إعلانات، وعندي مبدأ إني ما بروحش برامج بفلوس، ومش بعمل أفلام، ومعنديش بيزنس.”
وأوضح ياسر جلال أن أجره من الأعمال الفنية يمثل مصدر دخله الأساسي طوال العام، قائلاً: “الفلوس اللي باخدها في المسلسل بعيش عليها طول السنة، بدفع حوالي 40% ضرائب، والباقي بيتصرف على متطلبات الشغل والحياة.”
وأضاف: “النجومية لها تمن، لما أشتري بدلة لمسلسل ممكن توصل لـ100 ألف جنيه، ولو جبت 10 بدل و10 بناطيل دي تكلفة، ولما آخد أولادي وأخرج في مكان لازم أراعي ظروف معينة، لأن الشهرة لها التزامات.”
وأكد الفنان أنه ينفق أمواله على أسرته ويحرص على الالتزام بمسؤولياته، موضحًا: “فلوسي مش ليا لوحدي، هي لأسرتي، وإحنا بنعيش كويس وبنسافر خارج مصر، لكن الفنان عشان يقدر يحوش لازم يكون عنده مصدر دخل إضافي أو بيزنس.”
