كتبت – آلاء السيد
أعلن الفنان محمد الشرنوبي عن الفترة الصعبة التي مر بها قبل 7 سنوات ابتعد فيها عن الغناء بسبب بعض المشاكل التي مر بها، جاء ذلك خلال لقائه في برنامج “صاحبة السعادة” مع إسعاد يونس، و كشف الفنان أنه خلال هذه الفترة لم يستطع الغناء، لكنه انشغل في التمثيل واضطر لقبول بعض الأدوار فقط لمجرد تسديد أقساط المالية
وقال “الشرنوبي”: “في السبع سنين اللي فاتوا مكنش عندي اختيار تاني غير إني أمثل، كان عندي أقساط ومسئوليات وحاجات بتدفع كل أول شهر ومشاكل ومحاميين، كان في مصاريف كتير جدا لازم أكون مأمنها، والحقيقة كان بيجي فترات كتير جدا مش عارف أكون مأمن حاجة وعندي قسط كمان 15 يوم ومش عارف أعمل إيه، وطول عمري خايف من فكرة إني اشتغل عشان عندي أقساط ودا حصل، كان في حاجات الحمد لله في النص حلوة أوي وبحبها أوي وتجارب كنت محتاج أعملها بس على الناحية الثانية في حاجات عملتها لمجرد إن عندي أقساط”.
وتابع الفنان: “هما سبع سنين كنت بلف في دايرة من مشاكل لمطبات لجواز وطلاق، أنا اتغيرت أوي نضجت بقيت شايف الحياة بمنظور مختلف، نزلت على الأرض أنا كنت بني آدم حالم طاير عايش في عالم ديزني عالم مش حقيقي، لكن ابتديت يبقى عندي أفكار خاصة”، وطرح أحدث ألبوماته “بعد الليل” في صيف 2026.
