محمد حبيب
اختفى لاعب منتخب مصر للمصارعة أحمد فؤاد بغدودة، والذي يبلغ من العمر 22 عاماً، وذلك من مقر إقامة بعثة المنتخب خلال تواجده للمشاركة في بطولة إفريقيا، جاء ذلك بعد تتويج اللاعب بفضية البطولة الافريقية للمصارعة.
وكشف إبراهيم عادل عضو مجلس إدارة اتحاد المصارعة تفاصيل جديدة في واقعة هروب بغدودة وقال بداية الموضوع: “البعثة كانت راجعة من مدينة الحمامات على تونس العاصمة عشان يرجعوا مصر ودوروا عليه مش لقيوه وبلغوا اللواء عصام رئيس البعثة واللي كان مستني في تونس لحين انتهاء منافسات المصارعة الحرة والشاطئية”.
وتابع قائلاً: “طلعوا أوضته لقوا شنطة وعليها 2 تي شيرت قدام شوية كان تمويه من اللاعب عشان محدش يقول مش موجود واعتقدوا في البداية إنه بيشتري حاجة وراجع بس راحوا المطار وجه وقت الطيارة وهو مش موجود فرجعت البعثة وتم البدء في اتخاذ الاجراءات”.
وأضاف حول الإجراء الذي سيتخذه الاتحاد مع اللاعب: “عرفنا من الخارجية إن اللاعب سافر إلى فرنسا وهو معاه فيزا اتحاد أوروبي عشان كان مشارك في بطولة في إسبانيا من عدة أيام وبلغنا الاتحاد الدولي يعمل إيقاف لللاعب على السيستم، وللأسف فيه في حتة التجنيس حالياً بيوافق الاتحاد الدولي إن اللاعب يلعب لدولة ثانية من خلال تصريح عمل أو إقامة أو تصريح دراسة بيها، وبعد كده بيسمح للولد يلعب في الدولة اللي هو فيها وبيدي بلده الأصلي حق رعاية مبلغ بسيط”.
واختتم حديثه قائلاً: “حتى الآن لم نعثر عليه وفشلت كل محاولات التواصل معه عبر كل السبل ولا يرد على الرسائل عبر الماسنجر”.
ردود قوية من والد اللاعب بشﺃن الواقعة
قال فؤاد بغدودة في مداخلة هاتفية ببرنامج “كلمة أخيرة”، المذاع على قناة “أون إي” الفضائية: “معنديش مبرر للي حصل لكن هرد على ما قاله سكرتير الاتحاد المصري للمصارعة: “بيقول ان احمد بياخد 7 آلاف جنيه والله ابني ما شاف اكتر من 2200 جنيه ومن المشروع القومي من شهرين بس، انا راجل على قدي ومعرفش اعبر عن اللي جوايا بكلمك وأنا أب زعلان ومكبوت على ابنه وانا برضة مش عارف اوصل لابني”.
وتابع حديثه قائلاً: “لغاية وقتنا هذا معرفش عنه حاجة وانا مكنتش اعرف انه طالع مسافر يلعب بطولة افريقيا ومعرفش عنه حاجة، أحمد طول عمره بيحلم بيمدالية أولمبية، ابني بقاله 12 سنة في الاتحاد ماخدش من اتحاد المصاروعة حاجة وبياخد من المشروع القومي 2220 جنيه على البريد ومعايا ايصالات بكدا”، متابعاً: “ابني اتعرض لضغوط قبل افريقيا بشهرين، وبقاله سنة مخدش ولا جنيه من الاتحاد واتصرفله 16 الف جنيه وخصموا منه 14 ألف جنيه بحجه ضرايب واخد 1200 جنيه في الأخر”.
وأضاف: “أنا راجل بسيط سواق توكتوك، أنا راجل شقيان على ولادي وعندي غيره 2 أطفال، إبني مش بياخد 7 آلاف جنيه، ولايحصل على أموال منذ سنوات طويلة من الاتحاد”، معقباً علي اخبار هروبه:” الكل طالع يقطع في ابني ابني لعب بطولة في كرواتيا وكان لوحده لو كان هرب مكنش حد هيساله طفش ولا مطفش، أنا اللي بصرف على ابني وبطلع من قوت عيالي عشان أطلع بطل لمصر وفي الاخر يتقال عليه هارب”.
وأكمل حديثه قائلاً: “أنا راجل فقير على قدي وبشتغل سواق على توك توك ولا اعرف حد في فرنسا ولا برة، وبحافظ على كرامة ابني في وسط الناس، أنا مش قادر اجيب لابني جزمة يلعب بيها وشحت جزمة من صحابه عشان يلعب بيها”.
واختتم حديثه: “أنا اللي بصرف عليه والله، وبوجه لابني رسالة ارجع مصر هي أولى بيك وإحنا اتولدنا فيها وهنعيش ونموت فيها”.
