الاختيار مش دمعه فرّت من عيونك
مررت حلقك بمر القهر نزلت غصب عنك أو بخاطرك
أو فرحه زرعت جوَّه قلبك غيط مزهَّر بالملايكه
وانت ما غرستش حبوبه أو رويت أرضه بهواك
أو شمعه والعه بتنصهر تنزف حياتها ..
قادها غيرك في السكك للسهرانين وانت ف ونسْها ماشي تنعم بالحياه
أو ورده بتقطَّع ورقها ورقه ورقه ..
بين كل ورقه كام سؤال بيحيروك وبتفترض 100 افتراض
دون إجابه ..!!
الاختيار مش جبر خاطر .. إفتئات على صبح طيب وانتقام من ليل بغيض
وحياد فقير بيعفر الوش الحليب بسكوت مريع
ولا حبتين بينزو عطف أوحنين للعابرين طرق المجاهل والغياب ..
لقلوب حرمها البعد من حضن اللقا ، وانت مش نبع الحنين !!
الاختيار إنك تكون فوق حد سيف الفكره وازن فكرتك ..
تختار ما بين الله وحبك للوطن
وبين غروبك في الضياع
الاختيار روَّي أرضه ( المنسي ) دم
وشروق لكل العاشقين تفدي الوطن وبعزم بتخطي القدم
للشهيد في القلب شمعه مخلداه
والفاتحه والكرسي وياسين
نبيل مصيلحي
