حوار – مرام اللبان
اعتبر النجم الصاعد سليم الترك مسلسل “بابا المجال” من أفضل السيناريوهات التي قدمها في حياته الفنية، مشيرًا إلى أنه من أفضل الأدوار التي قدمها طوال مسيرته الفنية.
وأكد “الترك” في حواره لـ “الأنباء المصرية الجديدة“، أن بابا المجال يُنافس مسلسل “جعفر العمدة”، مضيفًا أن هناك أعمال جديدة لم يصرح بخا قبل ذلك.. وإلى نص الحوار كالتالي:
بداية حوارنا كيف كانت بداية دخولك في عالم الفن والتمثيل؟
الأول كنت بخاف أمثل عشان كنت بتكسف، فـ والدتي جابتلي كاميرا هدية فضلت أتصور كتير، ولاحظت أني بحب التصوير.
صديق والدي هاني باجوري شفني عمال أتصور كتير عجبته، وقالي هتعمل إعلانات وده كان البداية.
بس كنت بخاف أعمل حاجات غلط بعد كده الأستاذ هاني باجوري قالي أوعى تخاف لو خوفت عمرك ما هتنجح.
وقررت أكسر الخوف ده والحمد الله عملت إعلانات كتيرة أول إعلان مصاصة تاتوه.
مَن الذي ساعدك على دخول الفن؟
الأستاذ كريم عبد العزيز شافني من إعلان ساحل الشمالي، رشحني في فيلم فاصل ونعود، وده أول بداية أعمالي وكنت خايف جدًا.
وكل مشهد بيبوظ من التوتر والخوف، كان فيه مشهد من الفيلم كنت مخطوف وبعيط فيه والمخرج زعقلي جامد، قالي أنت فاشل فاشل مش هتنجح أبدًا روحت معيط.
وأنا بعيط المخرج قال أكشن صور، ولما قالي أنت فاشل قررت أتحدى المخرج ده وهبقى نجم كبير، وبعد ما المشهد خلص فضل يراضيني والحمدالله بدأت التمثيل وبقيت مشهور.
ما هي أصعب المشاهد التي قمت بتصويرها في أعمالك الفنية؟
فيلم معالي ماما، لأن الفيلم كله مقالب وألعاب نارية وتأذيت كتير، وأصعب مشهد كان في فيلم الأنسة مامي لما كنت في مسابقة سباحة.
مسلسل “بابا المجال” كان آخر أعمالك، حدثنا عن دورك!؟
أدواري صعبة شوية وبحب الصعب علشان يطلع الدور كويس، وأصعب مشهد كنت بنضرب من الفنان رياض الحولي بالجرباج، ومن أهم الأعمال في حياتي، الأستاذ مصطفي شعبان ممثل كبير، وكنت بعمل كل حاجة بحسبها.
– ما الذي حمسك لـ قبول مسلسل “بابا المجال” والمنافسة فيه بشهر رمضان 2023؟
لأن ده بنسبالي أهم أعمالي في وسط أهم النجوم، الأن المسلسل ده بينافس مسلسل “جعفر العمدة”.
وحاجة كبيرة ابقى واقف قدام الفنان رياض الحولي ومصطفي شعبان وباسم سمره وسوسن بدر، ومن هنا أعمل مشوار جديد كـ شخص سولي الصغير كبر بيعمل دراما واكشن.
ما هي الرسالة التي تقدمها من خلال مسلسل “بابا المجال“؟
اللي بياكل الحرام الحرام بياكله، الناس تبعد عن الحرام والسرقة، ومتكلش حق أهلك أو ناسك وتشتغل بضمير، وسكة الحرام مش مضمونة.
هل هناك شبه بين شخصية “زينهم” في بابا المجال، وبين سليم الترك في الحقيقة؟
دي شخصية ودي شخصية مختلفة، زينهم إبن أمه وبيعمل اللي على هواه، ومحدش بيتحكم فيه، سليم الترك بيحب التمثيل والرياضة والكورة الدراسة.
إنما زينهم بيحب الفلوس وميفرقش لو ده حرام علشان هو عاش في وسط علية بتاكل من الحرام.
هل تتابع أعمال رمضان؟
طبعًا، وعلى السوشيال ميديا كمان.
ما أكثر مسلسل أحببته خلال الموسم الرمضاني، وهل كنت تتمنى أن تشارك فيه؟
مسلسل “رشيد“، لأن هو زي مسلسل “الجعفر العمدة” ونفسي كنت أشارك في مسلسل رشيد علشان أنافس محمد رمضان.
لأني شاركت مع محمد رمضان في مسلسل “ابن حلال” وقالي أنت مبتعرفش تمثل ولا عمرك هتبقى ممثل مبتعرفش تتكلم، ولحد دلوقتي شايل الكلام ده لحد ما أنافسه وأقوله اللي مبيعرفش يمثل بقى أهم واحد من الممثلين.
هل بتابع ردود الأفعال على المسلسل، بتتأثر بنقد الجمهور على السوشيال ميديا؟
بتابع طبعًا.
لا مش بتأثر، علشان لو هحط ده في دماغي هزعل ومش هعرف أمثل، والحمد الله وقفت قدام ممثلين كبار.
ما الذي جذبك للعمل؟
حاجتين مش حاجة واحدة، أول حاجة علشان أنا بحب مصطفى شعبان ورياض الخولي جدًا، تاني حاجة المبلغ.
من مثلك الأعلى من الفنانين؟
الفنان كريم عبدالعزيز، لأن هو اللي شجعني على التمثيل.
من وجهة نظرك.. هل التمثيل يقلد المجتمع أم يعطي رسالة؟
للأسف المجتمع هو اللي بيقلد التمثيل بس بيقلد في الغلط، التمثيل بيأدي الرسالة وبينصح، المجتمع بياخد وبينفذ مش بياخد بـ نصيحة.
هل هناك أعمال جديدة ممكن أن نرآك فيها؟
بأذن الله في أعمال كتير، وفيه أعمال من تأليفي، ودا أول تصريح أقوله عن الموضوع دا:
- بعمل فيلم الحريفة
- فيلم وش الريح
- مسلسل يوميات زوجة مفروسة أوي جزء الخامس
- مسلسل اسمه تجامل بأخلاقك عن التنمر
- فيلم أسمه زين بيتكلم عن مستشفى 57357
- فيلم رعب اسمه صياد الارواح وده رعب
- مسلسل في بيتنا فأر
ما الكلمة التي تختتم بها الحوار وتوجهها لمتابعيك؟
أحب أقول للمجتمع أن ميقلدش ممثلين في الغلط، لأن الممثلين بيأدي رسالة للنصيحه لأن 80% من المجتمع بيقلد الممثيلن في الغلط، وربنا يحفظنا جميعا من كل شر.
وبحب أشكر الناس اللي وقفت جمبي في التمثيل واللي شجعني، وبشكر الناس حبتني في الشخصية سولي وزينهم وان شاء الله هعمل حاجات كنير وجديدة.
وبشكر جدًا الفنان كريم عبدا لعزيز اللي هو السبب خلاني أمثل واقف على رجلي، وبشكر الأستاذ هاني باجوري اللي إكتشف موهبتي.
وأي شخص عنده موهبة التمثيل إسعى وروح ورش كاستنج، وإبدأ مشوارك مش تعتمد على حد إسعى علشان توصل.
