كتبت – رحمة ماهر
كشف الفنان الكبير أحمد ماهر عن موقف طريف، جمعه بالفنان عادل إمام أثناء تصوير فيلم “شمس الزناتي”، مشيرًا إلى أنه لا يُفضل مشاركة الآخرين طعامه، وهو ما تسبب في مفاجأة للزعيم.
وقال أحمد ماهر خلال تصريحات تلفزيونية: “دي طبيعتي من زمان، أنا ممكن أعزم لكن مش من أكلي، ورحمة الله عليها والدتي كانت دايمًا تقولي إن من صغري وأنا كده، والأكل بالنسبة لي حالة خاصة، زي خلوة روحية، مبحبش حد يشاركني فيها”.
وأضاف: “أنا من برج الأسد، يمكن عشان كده بحس إن الطبق اللي قدامي رزق من عند ربنا، مش بحب حد يزاحمني فيه، حتى لو طلبت أكل للناس، لازم طبقي يفضل لي أنا لوحدي”.
وتحدث أحمد ماهر عن الواقعة قائلًا: “كنا بنصور مشهد في الجبل ضمن فيلم شمس الزناتي، وأستاذ عادل إمام اتأخرت عليه العربية اللي بتجيب له الأكل والمية، وسأل مين اللي قاعد بياكل، قالوا له أحمد ماهر، فجالي بنفسه وقال لي: يا حمام، بتاكل كريز في الجحيم ده؟! كريز في الجبل؟ ده ما يبوظش؟”
وتابع أحمد ماهر ضاحكًا: “قلت له لأ، لأني جايب معايا كولمان فيه تلج، فقال لي طب مافيش اتفضل أقطف حتى؟ قولتله من أكلي، ورسول الله ولا حباية”.
يُذكر أن أحمد ماهر شارك في موسم رمضان 2024 بمسلسل “صيد العقارب”، الي ضم أبرز الفنانين وهم: “غادة عبد الرازق، رياض الخولي، سيمون، محمد علاء، مجدى بدر، سامية عاطف، ميار الغيطي”، ويعد المسلسل من تأليف باهر دويدار، إخراج أحمد حسن، وإنتاج شركة “فينومينا” للإنتاج الفني.
