كتبت تحية محمد
الكلمتين دول متوقف عليهم ببساطة حياة اسرتك وبيتك
عندنا حملة قومية للتطعيم ضد مرض شلل الأطفال لجميع الأطفال من عمر يوم وحتى عمر5 سنوات .
ستبدأ يوم الاحد 11/12/2022
وتنتهى يو الاربعاء 14 /12/2022
وهو ده اللي عاملي قلق بسببه؟!
ما انتو كل سنة بتعملوا حملة واتنين وثلاثة ..
وممكن نطعم أو لا مش حوار يعنى .
لا.. يا باشا عندك لو سمحت
مينفعش أبدا إن حضرتك مطعمش ابنك فى الحملة دى بالأخص .
ليه يعنى.. اشمعنا الحملة دي ؟؟
علشان الطعم اللى احنا بطعم بيه فى الحملة دى مختلف تماما عن الطعم اللى حضرتك بطعم بيه ابنك تطعيمه الشهرية أو حتى تطعيمات الحملات اللى فاتت .
الطعم ده بيقاوم فيروس شلل الأطفال الشرس اللى للأسف أصبح موجود فى البيئة بشكل كبير، ويحمل نمط 2 من فيروسات الشلل .
طيب بالراحه علينا واحده واحده .
يعنى هو فيه حالات شلل أطفال ظهرت فى مصر ؟؟؟
لا إلى الآن الحمد لله مفيش أى حالات شلل أطفال فى مصر من عام 2004 يعنى من 18 سنة .
طيب فيه إيه ؟؟ وليه القلق ده ؟؟
هاقولك حاضر.. علشان وجود الفيروس الشرس فى البيئة المحيطة أمر فى غاية الخطورة . معناه إن فيه ناس حاملة للمرض بدون ظهور أعراض .
برضه يعنى إيه ؟ ؟
يعنى اى طفل مش عنده مناعة ضد الفيروس بجرعات التطعيم المستحقة ليه. هيكون معرض للإصابة بالمرض بنسبة تتعدى 90 % .
طيب إيه المطلوب بالضبط ؟؟؟
المطلوب بكل سهولة
إن المعلومة تكون عند الجميع بأهمية تطعيم الأطفال كلها فى الحملة وان مفيش طفل واحد مطعمش . لأن وجود طفل غير مطعم معناه امكانية إصابته وإصابة غيره بالفيروس .
طيب هو فيه موانع للتطعيم ؟؟؟
فيه موانع للتطعيم منها موانع دائمة وموانع مؤقتة
الموانع الدائمة:
ودى ممنوع فيها التطعيم خالص :
أمراض نقص المناعة سواء مكتسبة أو وراثية .
كمان أمراض لوكيما الدم والأمراض السرطانية .
وكمان لو فيه طفل يتعالج بدواء الكورتيزون لمدة طويله
أما الموانع المؤقتة :
ارتفاع درجة حرارة الطفل أو تعرضه لنزلة معوية شديدة فى الحالة دى يتأجل التطعيم لحين تحسن حالة الطفل .
طيب كمان سؤال ؟؟؟
أنا ابنى فى الحضانة ياترى اعمل إيه ؟؟
مفيش أى مشكلة حضرتك الفرق سوف تمر على كل الحضانات كل الأطفال اللى ف سن التطعيم سيتم تطعيمهم.
وكمان هيكون فيه فرق ثابتة فى الوحدات الصحية ومكاتب الصحة.
طبعا ده كله بجانب الفرق المتحركة من شقة إلى شقة .
لازم يكون هدفنا كلنا أن نحافظ علي مصر.. خالية من مرض شلل الأطفال
