حوار – وفاء العسكري
صرحت الفنانة مريم الجندي أحد أبطال مسلسل كوبرا، بطولة الفنان محمد إمام، والذي يُعرض في النصف الثاني من شهر رمضان، عن حبها لفريق عمل المسلسل.
حيث قالت مريم الجندي: “مش أنا طبعًا اللي ممكن أتكلم عن محمد إمام، ده نجم كبير، وده موضوع مفروغ منه، النجومية والمهنية والشطارة دي مش مجال مناقشة حتى، لكن بجد قمة في التواضع والإحترام والطيبة، واللذاذة مع الكل من الصغير للكبير”.
وتابعت مريم: “كل الفريق كمان لايق عليه، ونفس الطريقة واللذاذة والدنيا عندهم سلسة، ومن قلبي فعلًا بشكره على الفرصة الجميلة دي، وعلى الكواليس الرائعة مع كل الفريق، بجد يعطي مساحه للممثلين الصغيرين، وكمان بيساعدهم، بإختصار: هذا الشبل من ذاك الأسد فعلًا، زعيم جونيور”.
وتحدثت الفنانة مريم الجندي عن ما جذبها للموافقة على ورق الشخصية، معلقًة: “بمنتهى الأمانة قبل ما أشوف الورق، فرحت مبدئيًا للشغل مع إمام وأستاذ أحمد شفيق خورشيد، وشركة الإنتاج، والورق بقى من أول ما تقرا تتشد على طول، مكتوب كويس، وغني بمواقف وتفاصيل حلوة، وإيقاعه مظبوط ما تزهقش”.
وأضافت الفنانة: “ومثير ومسلي وفيه أكشن وكوميديا، وبيلف بلاد ويفرجنا أماكن جديدة، ونجوم كثير ومختلفين، وأغاني حلوة، يعني كل اللي نفسك فيه، توليفة عمل تعجب أي حد، ومناسب جدًا للتليفزيون وللعيلة كلها تتفرج في رمضان مع بعض”.
واستطردت مريم الجندي: “ده غير طبعًا أني كان نفسي أعمل كوميدي كمان، ومش هلاقي فرصة أحسن من دي أكيد، والدور مختلف تمامًا عن دوري في العتاولة، ومبدئيًا ده نوع وده نوع ثاني، وأدوار الكل مظنش أنا بس في العملين مختلفة تمامًا، يجمعهم أن الإثنين متشافين كويس والناس عاجبها”.
وأكملت الفنانة حديثها: “الإثنين فيهم نجوم كبار ومحبوبين جدًا، والإثنين مخرجين كبار وشركات إنتاج متميزة حاجة حلوة، والعتاولة 30 حلقة بيكون له طبيعة خاصة، إنما كوبرا 15 حلقة إيقاعه سريع وشبابي أكثر، والعتاولة شعبي جدًا وله جمهوره اللي بيعجبه، وكوبرا مناسب للشباب بطل بيمثلهم”.
وتابعت الفنانة مريم الجندي: “ويعجبهم ما يزهقوش منه، ومع ذلك كل العيلة تتفرج عليه وتتبسط، ومحمد إمام جمهوره في الوطن العربي كله، واسمه على أي عمل خلاص بيتشاف، وهو الحقيقة دايمًا شاطر في تقديم توليفة ناجحة، ومواكب لكل جديد”.
وعن تجسيدها لدور شادية في مسلسل العتاولة، علقت: “شادية شخصية مركبة ولها أبعاد كثير، وبتتعرف عليها 30 حلقة، لكن نسمة بنت خفيفة لطيفة لاسعة شوية بنشوفها حلقتين خطف كدة، بس عامة المنافسة لو موجودة فدي حاجة حلوة، وياريت أنا بحب فصل المتفوقين”.
واستطردت الفنانة حديثها: “كل ما يبقى عندنا أعمال كويسة أكثر يكون أحسن، وبطولات نجوم كبار أحسن وأحسن، والناس بتحب الشغل الحلو، والنجوم الكبار بيفرحوا لنجاح بعض، والمنافسة بتشجعهم على شغل أحلى”.
وعن صعوبات التصوير في مسلسل كوبرا، علقت الفنانة مريم الجندي: “بالعكس شخصية نسمة لذيذة وخفيفة، ومكتوبة من الأول كويس، وإمام ساعدني في تفاصيل لذيذة، وكان عنده حق بصراحة وخلاني أشوفها أحلى، وبيهتم بالممثل اللي قدامه أنه يطلع في أحسن حال، ودي مش حاجة متوفرة كثير”.
وتابعت مريم الجندي: “والمخرج هايل ومتمكن من أدواته وبيوجه الممثل صح، مثلًا أستاذة إيمان الخميسي خليتني أشوف نسمة بكل تفاصيلها، أول ما شوفت كوزبرة دخلت في الفريق وهوب عملت معاه جزء من الأغنية، وحقيقي كل الفريق متعاون وساعدني، كواليس حلوة ومريحة”.
واختتمت الفنانة مريم الجندي، التي تقوم بتجسيد شخصية “نسمه” في مسلسل كوبرا حديثها، قائلًة: “يا رب بس نسمة تعجب الناس، والصعوبة الوحيدة كانت بس في تنسيق المواعيد، والسفر، والنوم وكدة علشان أنا كنت بصور العتاولة”.
