مرام اللبان
كشفت الناقدة الفنية مها متبولي رأيها عن فيلم “ولاد رزق 3“، والذي عرض الفترة الماضية، وحقق أعلى نسبة ايرادات في شباك التذاكر، مؤكدة أن المنتج طارق العريان يتميز بـ إنتاج قوي.
وتحدثت مها متبولي من خلال تصريحات خاصة لـ موقع “الأنباء المصرية الجديدة“، قائلة: “ولاد رزق فيلم تجاري، بمعنى أن في إيفهات وفي أكشن، والأكشن بتاعه حلو لأن طارق العريان مخرج حلو، وهو فيلم الناس تضحك وتنبسط منه، لكن مش أكتر من كده”.
وأضافت الناقدة الفنية: “والناس مبسوطة بالفيلم عشان هي بتضحك في النص الأولاني، والنص التاني معمول أكشن على أعلى مستوى، وطارق العريان عنده إنتاج متميز، قدر أن يطلع الفيلم بالشكل ده”.
الناقدة مها متبولي
مها متبولي تكشف رأيها في سيناريو فيلم ولاد رزق 3
وأكدت مها متبولي: “هل الكوميدي اللي في الفيلم معتمدة على مواقف كوميدية، عشان نقدر نقول السيناريو حلو، والسيناريو لما يبقى حلو لما يكون مبني على مواقف كوميدية، لكن السيناريو في ولاد رزق مبني على الإيفهات، وطبعًا في فرق كبير”.
واستكملت “متبولي“: “ولما نتفرج على فيلم من أفلام عادل إمام بنلاقي أن في فعلًا مواقف كوميدية، وعشان كده أفلامه لحد دلوقتي عايشة، لكن الفيلم ده معتمد على الإيفهات، وبعدين الإيفهات بتخلص والأكشن كل شوية بيتغير، يعني لو شفت الأكشن اللي طلع بيه أحمد عز الأول، ولكن دلوقتي الأكشن بيتغير، ولما بيتغير يبقى كده فيلم عادي جدًا”.
وأكملت مها متبولي: “كمان الفيلم في حاجات جرافيك، وزي ما قولت أن طارق العريان معه إنتاج كويس، وقدر أن يجيب أدوات عالية، وكمان تركي آل الشيخ لما عمل ولاد رزق، هو بيعمل نوع من أنواع السياحة، والفيلم يعتبر تجاري سياحي من خلال نجوم السينما بتاعتنا احنا مش أكتر من كده”.
