جهاد عامر
عبرت ابنة الفنان أحمد راتب عن فخرها بوالدها على صفحتها الشخصية بفيسبوك، و أشارت إلى أنها كانت لا تراه أحيانًا لمدة طويلة بسبب ظروف عمله، الصعبة.
حيث نشرت لمياء ابنة أحمد راتب، صورة والدها الراحل، وعلقت عليها قائلة: “تصدق يا بابا إن لحد دلوقت فيه ناس فاكرة إن شغلك كان سهل، إنه كان هزار ولعب وشهرة بس، مايعرفوش إننا كان ممكن نقعد يومين مانشوفكش من غير ما تكون مسافر لأنك كنت بتصور 18 ساعة متواصلة”.
وتابعت لمياء راتب: “ميعرفوش إنك كنت بتقف على المسرح ودرجة حرارتك 40، مايعروفش إنك كان ممكن تنام ربع ساعة في كرافان في التصوير لحد لما المشهد يجهز، أو تقعد تستنى 3 ساعات عشان يظبطوا إضاءة مشهد هياخد ف تصويره ساعتين وهيظهر على الشاشة 3 دقايق، ميعرفوش إنك كنت بتلبس صوف في أغسطس وبتنزل البحر في يناير”.
وأضافت لمياء: “مايعرفوش إن مناخيرك اتكسرت ف تصوير مشهد وأثرت على حياتك كلها، مايعرفوش أنك كنت بتحترم المخرج وتسمع كلامه وتقول له يا أستاذ حتى لو أصغر منك بعشرين سنة”.
وأشارت ابنة الفنان الراحل أحمد راتب إلى أنها فخورة بوالدها، وفخورة بتعته على مدار حياته وتقدر أعماله الفنية التي قدمها طوال مشواره الفني.
واستكملت لمياء أحمد راتب: “أنا فخورة قوي إني بنتك، أنا عمري ما هنسى تعبك وشقاك اللي كبرت عليهم، أنا عمري ما هنسى إنك كنت أحن أب وإنسان في الدنيا”.
وأتمت حديثها قائلة: “ربنا أنعم عليك إنك تربي بناتك التلاتة وتجوزهم وتشوف ولادهم، وبعت لك حج بيته لحد عندك هدية من شركة السياحة لكل طاقم عمل مسلسل أم كلثوم، لو مكنتش في الجنة بكل اللي فات ده، فا أنت في الجنة بقلبك السليم الطيب.. بحبك قوي وهفضل أدعي لك لحد لما أجيلك”.
