كتبت – بسمة غربية
كشفت الفنانة فريدة سيف النصر، عن كواليس مشاركتها في فيلم “فرقة الموت”، بطولة الفنان أحمد عز، والذي بدأ تصويره مؤخرًا.
وأضافت فريدة سيف النصر، مجموعة من الصور أثناء كواليس العمل، عبر حسابها الشخصي بموقع الفيسبوك، وقالت: “في يوم جميل والهواء شديد جدًا بقى يدخل الهدوم زي البراشوت وضحكت ضحك عمري برغم الألم والله.. الفيلم ده من تلات أفلام وكبار جدًا هو اللي باعمله أنا غريبة مش أي شخصية تشدني”.
وأكملت فريدة: “والله كلنا في الشغل مالناش سيرة غير غزة والعيال لكن ده شغلنا.. المعلمة قشطة في فرقة موت مع الجمال والأدب والذوق سوبر ستار أحمد عز.. سعيدة إني بتقابل مع جيل جديد”.
وأردفت الفنانة: “اتفاجأت أن عز عارف شغلي وكمان وهو بيتفرج عليا وأنا باصور عمال يشكر فيا وصلولي طبعًا، والأحلى مدير التصوير هو بتاع بدون ذكر أسماء، واتكلم عز علي نور الشريف بحب وإني محظوظة عملت معاه أهم أعمالي وهو عمل معاه وأهتم بيه جدًا.. ومحمود عبدالعزيز وجماله.. قد إيه بيحبهم”.
وتابعت “سيف النصر”: “أحمد عز كان نفسه يشتغل مع عاطف الطيب أنا عملت جبر الخواطر معاه وخدت جائزة من نادر جلال، أنا بجد أحمد الله محظوظة في الجيل اللي حضرته وأنا صغيرة من نجوم مش هتتكرر اتعلمت على ايديهم.. والجيل ده بتاع عز وأنا كبيرة عندنا أجيال هتكمل بجدارة”.
وقالت فريدة: “فيلم فرقة موت بطولة أحمد عز، آسر ياسين، القمر منة شلبي، الجميلة أمينة خليل، مع السوبر ستار دائما محمود حميدة الإضافة لكل عمل، وإنتاج هشام عبد الخالق، وإخراج أحمد علاء، منتج فني المحترم هاني عبدالله، بصراحة كلهم عشق العشق.. مافيش شعور أجمل من أنك تشتغل مع ناس فرحانة بيك ومخرج عارف إمكانياتك فبسببك تبدع”.
واختتمت الفنانة فريدة سيف النصر حديثها: هاقول لكم على حاجة تخبل.. تخيلوا أحمد عز ممكن يعمل كوميديا، بقي يقول لي إفيهات قسمًا بالله حلوة قد ما تفاعل معايا قولتها.. يارب ينجحوا كلهم ويكسروا الدنيا.
