كتبت – نسمة هاني
أثارت كندة علوش الجدل بسبب غيابها عن العرض الخاص لفيلم زوجها الفنان عمرو يوسف “درويش”، ثم ظهرت في لقاء مع برنامج “ET بالعربي” لتشيد بالمجهود الذي يبذله زوجها في أعماله الفنية، وآخرها فيلم “درويش”، الذي يُعرض حاليًا في دور السينما.
وقالت كندة: “عمرو لما بيدخل مشروع بيحط فيه روحه بكل المعاني علشان يطلع بأحسن شكل، والحمد لله ربنا بيوفقه، وفيلم درويش انتظرت على أحر من الجمر زي ما بيقولوا، الفيلم ده بالنسبة ليا لذيذ وفيه إنتاج عظيم من محمد حفظي وممدوح السبع”.
وأضافت: “إنك تعمل المرحلة دي مش حاجة سهلة، وهما عاملين مرحلة تاريخية، وعاملين لايت كوميدي، أنا بحب فريق العمل على المستوى الشخصي كلهم، كل اللي موجودين في الفيلم ممثلين رائعين”.
وعلّق الفنان عمرو يوسف خلال العرض الخاص لفيلمه “درويش” على الأخبار التي انتشرت مؤخرًا حول انفصاله عن كندة علوش، مؤكدًا أنه لا يهتم لمثل هذه الشائعات التي تلاحقهما من حين لآخر.
وقال عمرو: “نزل على تيك توك شائعات إن أنا وكندة انفصلنا، قلت ده خبر عبيط محدش هيصدقه، دخلت أقرأ التعليقات لقيت الناس مصدقة إننا فعلًا انفصلنا، وبيقولوا ليه اتطلقوا دول بيحبوا بعض، فده شر لابد منه، أتمنى أنه ينتهي على خير، وأنا مش هردّ على كل واحد، هرد لما يكون ناس محترمة واقفة أتكلم معاهم، لكن بتوع الشائعات اللي عايزين ريتش وتريند مش هردّ عليهم”.
