كتبت – ميار المكاوي
علقت الإعلامية ياسمين عز على واقعة اعتداء سيدة على حماتها، والتي أثارت جدلًا واسعًا على مواقع التواصل الاجتماعي مؤخرًا، وأحدثت حالة من الغضب الشديد تجاه السيدة التي اعتدت بالضرب على والدة زوجها.
وقالت ياسمين عز في برنامجها كلام الناس، إنها لن تبدي رأيًا شخصيًا في هذه الواقعة، مؤكدة أن رأيها من المؤكد معروف لدى الجميع، مشيرة إلى أن الفيديو بشكل عام مرفوض حتى لو كانت الحماة قد استفزت زوجة ابنها.
وأضافت ياسمين عز: “الحادثة مؤسفة، والفيديو بشكل عام مرفوض وغير مقبول سواء الحماة استفزتها أو لأ، وإحنا بقينا ماشيين بالوثائق والفيديو ظاهر إنك ضربتيها، وما سمعناش قالت لك إيه ولا نعرف دواخل بيتكم، والتصرف ده على العلن غير مضبوط، وزودتيها شوية ده أنتي جبتيها من شعرها، ووالدتك حاولت تفصل ومفيش”.
وأكملت ياسمين عز: إنتي فيه غضب شديد جواكي ونار.. لو أنتي وصلتي للمرحلة دي اطلقي وأمشي، ولو حماتك مضايقاكي لهذه الدرجة أمشي.. أمشي لو عايشة في نار، أنا مش ضد الطلاق في الحالات دي، أو الحالات اللي تستدعي ده، وكان أحسن لك لو وصلتي للمرحلة دي تمشي، وأنا عمري ما شفت حد بيضرب حد كده، والفيديو ده يحبسك ولو جوزك كمل في القضية هيحبسك”.
وواصلت ياسمين عز: أنا مش هقول رأيي وأنتم أكيد عارفين رأيي، وبطلت أدخل في الأمور الشخصية، لكن بعد شوية هننساكي بس منطقتك وقرايبك مش هينسوكي، وهتفضلي الست اللي ضربت حماتها، والدرس المستفاد أنك لو وصلتي لهذه المرحلة من الغضب أمشي وروحي بيت أهلك وأوصلي لحل.
كما سردت ياسمين عز بعض التعليقات من المتابعين على الواقعة، والفرق بين تعليقات السيدات والرجال قائلة: “فيه جزء كبير من السيدات بتقول.. أكيد هي استفزتها.. والجزء الآخر من السيدات بيقول عيب وما يصحش.. لكن كل الرجالة رأي واحد.. وفعلا الراجل شخصية ورأي واحد في كل العصور إحنا ممكن نختلف مع بعض لكن الرجالة على قلب رجل واحد، وكلهم قالوا الست غلطانة. ولو مراتي عملت كده هحبسها إلا أمي”.
